Sanjay Raut News : संजय राऊत वक्तव्यावर ठाम ; म्हणाले, 'त्यांना' बाहेर 'चोरमंडळच' म्हणतात..'

Maharashtra Budget : शिंदे-भाजप सरकारने तपास यंत्रणांच्या माध्यमातून किरीट सोमय्यांसारख्या २८ चोरांना क्लिनचीट देण्याचा उपक्रम राबवला आहे. हे विधीमंडळ नाही, चोरमंडळ आहे. त्यांनी आम्हाला पदावरून काढलं तरी आम्ही पक्ष थोडीच सोडणार आहे. आम्ही पक्षातच राहणार आहोत, पदे आम्ही ओवाळून टाकतो, अशी घणाघाती टीका संजय राऊत (Sanjay Raut) यांनी केली होती.

संजय राऊतांच्या या वक्तव्यावर राज्य विधिमंडळामध्ये जोरदार घमासान घडून आला. संजय राऊत यांच्यावर हक्कभंग दाखल करण्यात यावा, अशी मागणी सत्ताधारी आमदारांकडून आली. याबाबत दोन दिवसात विचार करून निर्णय घेऊ, असे विधानसभा अध्यक्ष राहुल नार्वेकर यांनी म्हंटले आहे. यावर आता पुन्हा राऊतांनी स्पष्टीकरण दिले आहे.

संजय राऊत म्हणाले, 'मी देशाच्या सर्वोच्च सभागृहाचा सदस्य आहे. विधीमंडळ असेल, संसद असेल सर्वच सभागृहाचा मी आदर करतो. शिवसेनेने संसदीय लोकशाहीवर कायम विश्वास ठेवलेला आहे. माझ्या विरोधात विधिमंडळात गदारोळ झाला, पण माझ्या बोलण्यामागची भावना समजून घ्यावी, मी कोणत्या संदर्भात म्हणालो, हे समजून न घेता, एकांगी पद्धतीने कारवाई होत असेल तर, हे लोकशाही परंपरेला धरून नाही.

"माझ्यावर हक्कभंग आणण्याचा पूर्ण अधिकार सदस्यांना असू शकतो. पण मी काय म्हणालो? ते समजून घेतलं पाहिजे. विरोधकांना देशद्रोही म्हंटलं जातं. ज्या पद्धतीने धनुष्यबाण आणि शिवसेना पक्षाची चोरी केली आहे. काही लोकं विधिमंडळात गेले. आमच्यावरती हल्ले करतात. विधिमंडळाबाहेर यांना चोर म्हंटलं जातं," असे संजय राऊत म्हणाले.