आयफोनपासून बीएमडब्लूपर्यंत गिफ्ट अन् दोन बड्या अभिनेत्री अडकल्या जाळ्यात

मुंबई : दोनशे कोटी रुपयांच्या खंडणी प्रकरणातील आरोपीकडून कोट्यवधी रुपयांची गिफ्ट स्वीकारणाऱ्या दोन अभिनेत्री आता सक्त वसुली संचालनालयाच्या (ED) जाळ्यात अडकल्या आहेत. जॅकलिन फर्नांडिस (Jacqueline Fernandez) आणि नोरा फतेही (Nora Fatehi) या त्या दोन अभिनेत्री आहेत. त्या आता चांगल्याच अडचणीत आल्या असून, त्यांच्यामागे ईडीच्या चौकशीचा ससेमिरा लागला आहे.

सुकेश चंद्रशेखर (Sukesh Chandrasekhar) असे या आरोपीचे नाव आहे. तब्बल दोनशे कोटींच्या खंडणी प्रकरणातील तो मुख्य सूत्रधार आहे. त्याचा आणि अभिनेत्री जॅकलिन फर्नांडिसचा एक फोटो सोशल मीडियावर व्हायरल झाला होता. हा फोटो पाहून जॅकलिन आणि सुकेशचे प्रेमसंबंध होते का, असा प्रश्न उपस्थित झाला होता. हा फोटो या वर्षी एप्रिल-जून महिन्यातील आहे. त्यावेळी सुकेश हा जामिनावर बाहेर होता. सुकेश हा जॅकलिनला चेन्नईमध्ये चार वेळा भेटला होता. या भेटींसाठी त्याने प्रायव्हेट जेटचीही व्यवस्था केली होती, असे समजते.

आता याच सुकेशने जॅकलिनला भेट म्हणून 52 लाखांचा घोडा आणि 9 लाख रुपयांची पर्शियन मांजर भेट दिल्याचे समोर आले आहे. याचबरोबर त्याने मिनीकूपर कार आणि अनेकवेळा जॅकलिनला महागडे दागिने भेट दिले होते. त्याच्याकडून तिने दीड लाख डॉलरचे कर्जही घेतले होते. अभिनेत्री नोरा फतेही हिला सुकेशकडून एक बीएमडब्लू कार, गुस्सी बॅग, आयफोन दिला होता. सुकेश याच्याविरोधात ईडीने आरोपपत्र दाखल केले असून, त्यात ही माहिती उघड झाली आहे. आता दोघींचीही ईडीकडून चौकशी सुरू आहे.

जॅकलिन आणि नोरा या प्रकरणात नुकत्याच ईडीसमोर चौकशीसाठी हजर झाल्या होत्या. सलग चार वेळा चौकशीला हजर होणे टाळल्यानंतर अखेर जॅकलिन ईडीच्या दिल्ली कार्यालयात हजर झाली होती. कर चुकवेगिरी प्रतिबंधक कायद्यातंर्गत जॅकलिनचा जबाब त्यावेळी नोंदवण्यात आला होता. जॅकलिन आणि नोराचे आर्थिक व्यवहार आणि सुकेश चंद्रशेखरसोबत त्यांची ओळख यामुळे त्या ईडीच्या रडारवर आहेत.