Sushma Andhare News : "मला नरडं तर त्यांना गळा, अमृता वहिनींची मराठी ऐकून कानात शिसं ओतल्यासारखं.."; अंधारेंनी डिवचलं !

Sushma Andhare on Amruta Fadnavis : राज्याचे उपमुख्यमंत्री देवेंद्र फडणवीस यांच्या पत्नी अमृता फडणवीस यांनी काल झालेल्या मुलाखतीदरम्यान शिवसेना ठाकरे गटाच्या नेत्या सुषमा अंधारे यांच्यासंदर्भात वक्तव्य केले होते. सुषमा अंधारे या मला माझ्यासारख्याच वाटायच्या, असं वक्तव्य त्यांनी केले होते. आता यावरून अंधारे यांनी फेसबुक पोस्ट लिहीत अमृता फडणवीस (Amruta Fadnavis) यांचा समाचार घेतला आहे.

सुषमा अंधारेंच्या,"अमृता वहिनींना मी त्यांच्यासारखे वाटते असं त्या जाहीरपणे एका मुलाखती दरम्यान म्हणाल्या. मी सतत विचार करत होते की मी त्यांना कोणत्या अँगलने त्यांच्यासारखी वाटत असेल बरं? कारण दिसायला तर त्या निश्चितपणे माझ्यापेक्षा अधिक सुंदर आहेत. श्रीमंत ही आहेत. बाकी मला नरडं आहे त्यांना गळा आहे. मग काय साधर्म्य असेल आमच्यामध्ये?" असा प्रश्न त्यांनी केला आहे.

पुढे त्यांनी लिहीलं की, "पण, मग मला कधीतरी वाटलं की, कदाचित भाषा प्रभुत्व हे एक दोघीतलं साम्य असेल का? पण छे! कालची मुलाखत आणि त्यातलं त्यांचं कॉन्टिनेन्टल उच्चारात मराठी ऐकलं अन् खात्री पटली की आमच्यात साम्य असे काहीच असू शकत नाही," असं अंधारे पोस्टमधून खोचक वार केला आहे.

राज ठाकरेंवर ही निशाणा -

सुषमा अंधारे (Sushma Andhare) यांनी मनसे अध्यक्ष राज ठाकरे यांच्यावरही निशाणा साधला आहे. मराठी भाषेचे पाईक असा उल्लेख करत त्यांनी राज ठाकरेंवर लक्ष्य केले. अमृता फडणवीस यांची मस्त मराठी ऐकून त्यांना देखील कानात शिसे ओतल्यासारखं वाटलं असेल, असेही अंधारे म्हणाल्या.

अंधारेंनी लिहलं की, "पण त्या ही पेक्षा मराठी मनाचे मानबिंदू असणारे,मराठी भाषेचे पाईक, मराठी वाचवा चा ध्यास घेणारे, वेळप्रसंगी मेडिकल, इंजिनिअरिंग, लॉ ची पुस्तके सुद्धा मराठीत व्हावीत यासाठी कृष्णकुंजचे रान हादरवणारे राजदादा यांना, मी बोल्ली, मला चान्स मिळाली, या टाईपच मराठी ऐकून कानात शिसं ओतल्यासाखं झालं असेल..."