Mumbai : एकनाथ शिंदे मुख्यमंत्री होतील, याची कुणकुण होती... उदय सामंत

मुंबई : एकनाथ शिंदे हे मुख्यमंत्री होणार याची कुणकुण लागली होती. बाळासाहेब ठाकरेंच्या शिवसैनिकाला मुख्यमंत्री व्हायलाच आमची भाजपसोबत युती होतेय का, असे मनातच वाटत होते. मला त्याची जाणीव सुरवातीलाच झाली होती, अशी माहिती माजी मंत्री व मुख्यमंत्री शिंदे गटाचे आमदार उदय सामंत यांनी दिली.

एका वृत्तवाहिनीला दिलेल्या मुलाखतीत त्यांनी बंडखोरीमागच्या काही गोष्टी उघड केल्या. सामंत म्हणाले, एकनाथ शिंदेंच मुख्यमंत्री होतील, याची मला कुणकुण लागली होती. मला सातत्याने त्याची जाणीव होत होती. शिवसेना प्रमुख बाळासाहेब ठाकरेंच्या शिवसैनिकाला मुख्यमंत्री व्हायलाच ही भाजपसोबत युती होतेय का, असे मला मनातूनच वाटत होते. नेमके तसेच झाले, असे त्यांनी स्पष्ट केले.

या नव्या मंत्री मंडळात तुम्ही उच्च व तंत्र शिक्षण मंत्री आजी होणार की माजी होणार या प्रश्नावर उदय सामंत म्हणाले, याबाबत मुख्यमंत्री एकनाथ शिंदे व फडणवीस साहेब ठरविणार आहेत. महाराष्ट्राची सेवा करण्याची संधी मिळाली तर मी कधीही तयार आहे.

इतर पक्षात प्रवेश करण्याची वेळ आली तर कोणत्या पक्ष निवडाल. जसे मनसे, भाजप की प्रहार असे विचारले असता श्री. सामंत म्हणाले, अशी वेळ येणार नाही. विधीमंडळामध्ये अध्यक्षांनी अंतिम केला आमचा पक्ष आम्ही सोडणार नाही. विधानसभा अध्यक्षांनी महाराष्ट्र विधीमंडळ गट नेते म्हणून एकनाथ शिंदे यांना जाहीर केलेले आहे. आमचा गट हा शिवसेनेचा व बाळासाहेब ठाकरे यांच्या विचारांचा आहे.