अनिल परबांच्या अडचणीत वाढ? केंद्र सरकारचे अधिकारी साई रिसॉर्टवर

दापोली : राज्याचे माजी परिवहन मंत्री व शिवसेनेचे (Shivsena) नेते अनिल परब (Anil Parab) यांच्या अडचणीत वाढ होण्याची शक्यता आहे. केंद्र सरकारने परब यांच्या साई रिसॉर्ट प्रकरणी चौकशीसाठी नेमलेली समिती साई रिसॉर्टवर दाखल झाली आहे. या टीममध्ये चेन्नईमधील पर्यावरण संस्था व महाराष्ट्र कोस्टल झोन मॅनेजमेंटचे अधिकारी आहेत.

रिसॉर्टवर दाखल झालेल्या टीमकडून आतापर्यंत नेमकी काय कारवाई झाली याची चौकशी सुरु आहे. तसेच पर्यावरणाच्या हानीचीदेखील या टीमकडून चौकशी सुरु करण्यात आली आहे. भाजपचे (BJP) माजी खासदार किरीट सोमय्या (Kirit Somaiya) यांनी परब यांच्या मुरुड मधल्या साई रिसॉर्टने सीआरझेडचे उल्लंघन केल्याचा आरोप केला होता. त्यानंतर अधिकाऱ्यांकडून चौकशी करण्यात आली आहे. साई रिसॉर्टमध्ये दाखल झालेली टीम ही रिसॉर्टप्रमाणेच, कोच रिसॉर्टचीदेखील चौकशी करत असल्याची माहिती मिळत आहे.

रिसॉर्ट प्रकरणी महत्त्वाचे कागदपत्रे मिळावे यासाठी केंद्राच्या पर्यावरण विभागाची टीम दापोली प्रांत कार्यालयात दाखल झाली. परब यांच्या साई रिसॉर्टची पाहणी अधिकारी दापोली प्रांत कार्यालयात दाखल झाले. या अधिकाऱ्यांनी दापोली प्रांत यांच्याकडे महत्त्वाच्या कागदपत्रांबाबत चौकशी केली, अशीही माहिती मिळत आहे.

विशेष म्हणजे, राज्यात शिंदे सरकार स्थापन झाल्यानंतर पहिल्यांदाच परब यांच्या साई रिसॉर्टची पुन्हा यंत्रणेकडून चौकशी सुरू झाली आहे. दापोली कार्यालयात महत्त्वाच्या माहितीसाठी बराच वेळ अधिकाऱ्यांमध्ये बैठक झाली. किरीट सोमय्या यांनी साई रिसॉर्ट प्रकरणी तक्रार केली होती. या प्रकरणात अनिल परब यांची ईडीने चौकशी केली आहे.