एकनाथ शिंदेंचा समर्थकांना तातडीचा निरोप; ‘ते शब्द' हटवा!

ठाणे : शिवसेना नेते तथा नगरविकास मंत्री एकनाथ शिंदे (Eknath Shinde) यांचा ‘भावी मुख्यमंत्री’ असा उल्लेख असलेले बॅनर ठाणे शहरात आज (ता. ७ फेब्रुवारी) झळकले होते. ही गोष्ट ठाण्याचे पालकमंत्री शिंदे यांना समजल्यानंतर त्यांनी स्थानिक नगरसेवक राम रेपाळे यांच्याशी संपर्क साधून ‘भावी मुख्यमंत्री’ शब्द वगळा, असा आदेश दिला. त्यानुसार ते शब्द वगळण्यात आले आहेत. अशा प्रकारचे बॅनर विधानसभेच्या २०१९ च्या निवडणुकीनंतर लागले होते, त्यानंतर पुन्हा तोच उल्लेख असलेले बॅनर लागल्याने राज्यभर चर्चेला उधाण आले होते. (Immediately delete the word future Chief Minister' of Eknath Shinde on Flex)

नगरविकास मंत्री एकनाथ शिंदे यांचा ९ फेब्रुवारी रोजी वाढदिवस आहे. तसेच, त्यांचे पुत्र खासदार डॉ. श्रीकांत शिंदे यांचा ४ फेब्रुवारी रोजी वाढदिवस झाला. त्यानिमित्ताने त्यांच्या कार्यकर्त्यांनी ठाणे शहरात शुभेच्छा देणारे बॅनर लावले आहेत. मात्र, शहरातील वागळे इस्टेट चेक नाका परिसरात लागलेले फ्लेक्स चर्चेत आले आहेत. कारण, या फ्लेक्सवर नगरविकास मंत्री शिंदे यांचा उल्लेख ‘भावी मुख्यमंत्री’ असा करण्यात आलेला होता.

याबाबत पालकमंत्री एकनाथ शिंदे यांना माहिती मिळाल्यानंतर त्यांनी स्थानिक नगरसेवक राम रेपाळे यांच्याशी संपर्क करून भावी मुख्यमंत्री शब्द वगळण्याचे आदेश दिले. त्यानंतर राम रेपाळे यांनी बॅनरच्या ठिकाणी जाऊन बॅनरवरील भावी मुख्यमंत्री हा शब्द वगळला. या आधी देखील अशाच प्रकारचा भावी मुख्यमंत्री असा बॅनर लावण्यात आला होता.

दरम्यान, विधानसभेच्या २०१९ च्या निवडणुकीनंतरही असे बॅनर लावण्यात आलेले होते. महाविकास आघाडी स्थापन झाल्यानंतर शिंदे यांचे नाव मुख्यमंत्रीपदासाठी चर्चेत आले होते. उद्धव ठाकरे यांनीही भाजपशी काडीमोड घेताना माझा शिवसैनिक मला मुख्यमंत्रीपदावर बसवायचा आहे, असे सांगितले हेाते. पण, त्यानंतर उद्धव ठाकरे यांच्या नावाचा आग्रह काँग्रेस-राष्ट्रवादीच्या नेत्यांनी आग्रह धरला आणि शिंदे यांचे नाव मागे पडले. त्यानंतर शिंदे यांच्या वाढदिवसाच्या निमित्ताने पुन्हा भावी मुख्यमंत्री असे बॅनर ठाण्यात लागले होते.

एकनाथ शिंदे यांच्यावर आमचे प्रेम आहे. आम्हाला मनापासून वाटतंय की त्यांनी मुख्यमंत्री व्हावं, तीच भावना आम्ही बॅनरद्वारे व्यक्त केली आहे. आम्ही शिवसैनिक असून ठाणे हा शिवसेनेचा गड आहे. आम्ही पक्षप्रमुख उद्धव ठाकरे यांच्या कामावर खूष आहेत. पण, आमच्या स्वप्नातील आणि मनातील इच्छा आम्ही प्रकट केली आहे. एकनाथ शिंदे यांनी एकदा मुख्यमंत्री व्हावे, अशी आमची इच्छा आहे. ही पोस्टरद्वारे व्यक्त केलेली प्रेमाची गोष्ट आहे. ती आम्ही प्रकट केलेली आहे. न्याय मिळेल अथवा मिळणार नाही, हा राजकीय विषय आहे. आम्ही कोणावरही नाराज नाही. एकनाथ शिंदेंना एक वर्षासाठी का होईना मुख्यमंत्री म्हणून काम करू द्यावे, अशी आमची भावना होती, असे बॅनर लावणाऱ्या शिवसैनिकांनी सांगितले.