अजितदादा संतापले : इतक्या खालच्या पातळीवरच राजकारण कधी पाहिलं नाही..`

मुंबई : विधानसभेतील विरोधी पक्षनेते अजित पवार (Ajit Pawar) यांनी राज्य सरकारवर आज टिकेची झोड उठवली. वर्षभरापूर्वी मंजूर केलेल्या कामांनाही सरकारने स्थगिती दिल्याबद्दल तीव्र नाराजी व्यक्त करत इतक्या खालच्या पातळीवरच राजकारण या आधी कधी पाहिलं नाही, अशा शब्दांत संताप व्यक्त केला.

वढू येथील छत्रपती संभाजी महाराजांच्या स्मारकाच्या कामाला सरकारने स्थगिती दिली. तसेच जिल्हा नियोजन समित्यांनी मंजूर केलेल्या कामांना थांबविले. सहकारी संस्थांच्या निवडणुका स्थगित केल्या, अशी उदाहरणे देत अजित पवार यांनी सरकारचे हे खालच्या पातळीवरचे राजकारण आहे. एकनाथ शिंदे हे आमच्यासोबत या आधी मंत्रीमंडळात होते. तेच आता या कामाला स्थगिती देत आहेत. दिलीप वळसे पाटलांच्या भीमाशंकर कारखान्याच्या दोन जागांसाठी दोन दिवसांवर मतदान असताना निवडणुकीला स्थगिती दिली. खरे तर निवडणूक कार्यक्रम सुरू असताना त्यात हस्तक्षेप करता येत नाही. तरी सरकारने तो निर्णय घेतला. जिथे निवडणूक प्रक्रिया सुरू आहे, त्या पूर्ण होऊ द्या, असे आम्ही सांगितले. तरी सरकारने आपला निर्णय बदलला नाही, असे पवार यांनी स्पष्ट केले.

ही कामे काही आमची वैयक्कित नव्हती. 2021 पासूनची कामे थांबवली आहेत, हे न कळणारे असल्याचे स्पष्ट मत अजितदादांनी व्यक्त केले.

महाविकास आघाडी सरकार असताना राष्ट्रवादी काॅंग्रेसने निधीवाटपात अन्याय केल्याची तक्रार असल्याने सरकार असे निर्णय घेत असल्याचे सांगितल्यावर अजित पवार म्हणाले की किती शिळ्या कढीला ऊत आणताय? सारखं आपलं तेच तेच. तुम्हाला जायचे (शिवसेना सोडून) होते म्हणून काहीतरी मुद्दे मांडत आहात. विधानसभेने मंजूर केलेल्या अर्थसंकल्पानुसार निधीचे वाटप झाले आहे. मुख्यमंत्री उद्धव ठाकरे यांनी त्यास मंजुरी दिली होती. तरी आपले सारखे तेचतेच सांगितले जात असल्याची नाराजी पवार यांनी व्यक्त केली.