मायक्रो फायनान्स कंपन्यांना दणका : अवैध वसुलीवर कारवाईचे गृहराज्यमंत्र्यांचे आदेश...

मुंबई : अवैध पद्धतीने कर्जवसुली करणाऱ्या मायक्रो फायनान्स कंपन्यांवर पोलिस प्रशासनाने कारवाई करावी. तसेच कर्जदारांच्या तक्रारींची गंभीर दखल घ्यावी, असे निर्देश गृहराज्यमंत्री शंभूराज देसाई यांनी पोलिस अधिकाऱ्यांना दिले आहेत. सनदशीर मार्गाने कर्जवसुली न करता ज्या कंपन्या अन्यायकारक वागणूक देत आहेत, अशा कंपन्यांविरोधात कर्जदारांनी पोलिसात तक्रार द्यावी, असेही त्यांनी स्पष्ट केले.

कोल्हापूर जिल्ह्यातील मायक्रो फायनान्स कंपन्यांकडून अवैध पद्धतीने कर्जवसुली होत असल्याबद्दल यासंदर्भात मंत्रालयात गृहराज्यमंत्र्यांच्या अध्यक्षतेखाली अधिकऱ्यांची बैठक झाली. यावेळी आमदार प्रकाश आबिटकर, आमदार नरेंद्र दराडे यांच्यासह गृह विभागाचे प्रधान सचिव संजय सक्सेना, सहपोलिस आयुक्त मिलिंद भारंबे, कोल्हापूरचे पोलिस अधिक्षक शैलेश बलकवडे, तसेच व्हिडीओ कॉन्फरन्सिंगद्वारे कोल्हापूर परिक्षेत्राचे विशेष पोलिस महानिरीक्षक मनोज लोहिया, पुण्याचे सहपोलिस आयुक्त संदीप कर्णिक आदी वरिष्ठ अधिकारी उपस्थित होते.

कोल्हापूर जिल्ह्यातील मायक्रो फायनान्स कंपन्या अवैध पद्धतीने कर्ज वसुली करत असल्याचे निदर्शनास आले आहे. या कंपन्यांच्या प्रतिनिधींकडून असभ्य भाषेचा वापर करणे, कर्जदारांना रस्त्यात अडवणे, घरात घुसणे अशा प्रकारचे वर्तन होत असल्याच्या तक्रारी येत आहेत, अशी माहिती आमदार प्रकाश आबिटकर, आमदार नरेंद्र दराडे यांनी बैठकीत दिली.

यावर गृहराज्यमंत्री शंभूराज देसाई म्हणाले, अवैध पद्धतीने कर्जवसुली करणाऱ्या मायक्रो फायनान्स कंपन्यांवर पोलिस प्रशासनाने कारवाई करावी. कर्जदारांच्या तक्रारींची गंभीर दखल घ्यावी. कर्जदार नागरिकांनाही माझे आवाहन आहे की, सनदशीर मार्गाने कर्जवसुली न करता ज्या कंपन्या अन्यायकारक वागणूक देत आहेत, अशा कंपन्यांविरोधात कर्जदारांनी पोलीसात तक्रार द्यावी.

मायक्रो फायनान्स कंपन्यांच्या अवैध कर्जवसुलीबाबतच्या तक्रारींचा अहवाल पोलिस अधीक्षकांनी सादर करावा, अशी सूचनाही यावेळी केली. हा अहवाल केंद्र सरकारला पाठवला जाईल. कंपन्यांच्या चुकीच्या कार्यपद्धतीला वेळीच आळा घातला जावा, हाच यामागचा हेतू आहे, असेही मंत्री देसाई यांनी स्पष्ट केले.