Farmers March : शेतकऱ्यांच्या लाँग मार्चला मोठं यश! मुख्यमंत्री एकनाथ शिंदेंनी केली मोठी घोषणा

Eknath Shinde : मुख्यमंत्री एकनाथ शिंदे आणि देवेंद्र फडणवीस यांच्याबरोबर शेतकऱ्यांच्या शिष्टमंडळाने काल (दि.16 मार्च) आपल्या मागण्यांबाबत चर्चा केली.

त्यानंतर सरकारने शेतकऱ्यांच्या सर्व मागण्या मान्य केल्या असल्याचं सांगितलं. मात्र, तरी देखील शेतकऱ्यांनी आपला मोर्चा मागे न घेता स्थगित केला होता.

यानंतर आज मुख्यमंत्री एकनाथ शिंदे यांनी विधानसभेत शेतकऱ्यांच्या लाँग मार्चबाबत निवेदन केलं. तसेच शेतकऱ्यांच्या सर्व मागण्या मान्य करण्यात आल्याचं त्यांनी सांगितलं.

यावेळी सभागृहात बोलताना मुख्यमंत्री शिंदे म्हणाले, ''शेतकऱ्यांच्या सर्व मागण्या सरकारने मान्य केल्या आहेत. शेतकऱ्यांच्या मागण्या अनेक दिवसांपासून प्रलंबित होत्या. गायरान जमीन कसणाऱ्यांच्या नावे ती जमीन करावी, तसेच वन वनहक्काबाबत काही दावे प्रलंबित आहेत. तसेच शासकीय योजनांचा लाभ त्यांना मिळत नव्हता ''.

''यासह अनेक छोटे-मोठे प्रश्न मार्गी लावण्यासाठी काही मंत्री महोदयांची एक समिती गठीत करण्यात आली आहे. या समितीमध्ये काही अधिकाऱ्यांसह माजी आमदार जे. पी. गावीत, आमदार विनोद निकोले यांचा समावेश करण्यात आला आहे. तसेच या समितीने एक महिन्यात सविस्तर अहवाल सरकारला द्यावा, असे आदेश देण्यात आले आहेत '', असं मुख्यमंत्री एकनाथ शिंदेंनी सांगितलं.

''राज्य सरकारने कांदा उत्पादक शेतकऱ्यांना प्रति क्विंटल 300 रुपये सानुग्रह अनुदान दिलं होतं. पण सरकारने यामध्ये आणखी 50 रुपयांची वाढ केली आहे. तसेच शेतकरी, कामगार, अंगणवाडी सेविका यांच्या मागण्यांसाबबत एक समिती गठीत करण्यात आली आहे. ही समिती एका महिन्यात अहवाल देईल '', असं मुख्यमंत्री म्हणाले. त्यामुळे शेतकऱ्यांनी आपला लाँग मार्च मागे घ्यावा, असं आवाहन मुख्यमंत्री एकनाथ शिंदे यांनी केलं.

दरम्यान, सरकारने शेतकऱ्यांच्या मागण्या मान्य केल्या आहेत. त्यामुळे आता शेतकरी आपला लाँग मार्च मागे घेणार की नाही? याकडे सर्वांचे लक्ष लागले आहे.