मनसेला मंत्रिपद अन् भाजपच्या कोट्यातून विधानपरिषदेच्या चर्चा; राजू पाटलांचा मोठा खुलासा

डोंबिवली : भाजपच्या कोट्यातून मनसेचे एकमेव आमदार राजू पाटील (Raju Patil) यांना मंत्रीपद मिळण्याची जोरदार चर्चा आहे. यावर मनसेचे (MNS) आमदार राजू पाटलांनी पहिल्यांदा प्रतिक्रिया दिली आहे. आम्ही आत्तापर्यंत भाजपाला (BJP) पाठिंबा दिला, राष्ट्रपती निवडणूकीत देखील त्यांना पाठिंबा देत आहोत. हा पाठिंबा हिंदुत्वासाठी दिला आहे आणि याच करता आम्ही सरकार मध्ये आहोत. कोणत्याही अपेक्षेने किंवा मंत्रिपदाच्या अपेक्षेने आम्ही या सरकारला पाठिंबा दिला नाही, असे आमदार पाटलांनी सांगितले. त्यांनी आज माध्यमांशी संवाद साधला. (Raju Patil Latest News)

मनसेच्या एका नेत्याला भाजपच्या कोट्यातून विधानपरिषदेत आमदारकी मिळणार आहे, अशी चर्चा आहे. या प्रश्नावर पाटील म्हणाले की, जर विधानरिषदेवर आमच्या पक्षातील नेते आमदार म्हणून जात असतील आणि आमदारकी मिळत असेल तर आनंदच आहे. दोन्ही हाऊस मध्ये आमचा आवज असेल आणि अशी गोष्ट घडली तर स्वागत आहे, असे पाटील म्हणाले.

दरम्यान, राज्यसभा निवडणूकीत मनसेने आमदारांनी भाजपला पाठिंबा दिला होता. तेव्हा त्यांच्या एका मताला चांगलेच महत्व आले होते. मनसेच्या या सहकार्यामुळे त्यांना नव्या सरकारकडून भाजपच्या कोट्यातून मंत्रीपद दिले जाणार असल्याची चर्चा राजकीय वर्तुळात आहे. यावर पाटील म्हणाले, आम्ही जो आतापर्यंत भाजपला पाठिंबा दिला आणि आता पण राष्ट्रपती पदासाठी पाठिंबा देत आहे, तो फक्त हिंदुत्वासाठी देत असून याच करिता आम्ही सरकारमध्ये आहोत. कोणत्याही अपेक्षेने किंवा मंत्रिपदाच्या अपेक्षेने आम्ही या सरकारला पाठिंबा दिला नाही. पेट्रोल, डिझेलचे भाव या सरकारने कमी केल्याने या निर्णयाचे मनसेच्या वतीने स्वागत केले. याबरोबरच हे सरकार जनहिताचा निर्णय या पुढेही घेत राहिल, असे मत पाटलांनी यावेळी व्यक्त केले.