Munde VS Shelar : धनंजय मुंडे अन् आशिष शेलार सभागृहातच भिडले; नेमकं काय घडलं?

Mumbai : राज्याच्या विधिमंडळाचे अर्थसंकल्पीय अधिवेशन सध्या सुरू आहे. या अधिवेशनादरम्यान विरोधक आणि सत्ताधाऱ्यांमध्ये चांगलेच आरोप-प्रत्यारोप होतात. अनेकवेळा सत्ताधारी आणि विरोधकही आमनेसामनेही येतात.

आज राष्ट्रवादीचे आमदार धनंजय मुंडे आणि भाजपचे आशिष शेलार यांच्यात जोरदार खडाजंगी झाली. यावेळी दोघांचाही आवाज चढलेल्या स्वरात बघायला मिळाला. यामुळे सभागृहामध्ये काही वेळ गोंधळ झाला.

नेमकं काय घडलं?

धनंजय मुंडे हे सभागृहामध्ये बोलत होते. यावेळी ते म्हणाले, ''आज महसूल विभाग, कृषी विभाग, सार्वजनिक बांधकाम विभाग, वन विभागासह अनेक विषयावर चर्चा होणार आहे. त्यामुळे ज्या-त्या विभागाचे मंत्री महोदय येथे उपस्थित असायला पाहिजेत.

मात्र, येथे फक्त कृषी आणि वैद्यकीय विभागसोडून कुणीही हजर नाही. अर्थसंकल्पीय अधिवेशन आहे, त्यात डिमांडवर चर्चा आहे आणि तरीही मंत्री उपस्थित नाहीत'', असं म्हणत मुंडेंनी संताप व्यक्त केला.

यानंतर संबंधित मंत्र्यांना निरोप दिला आहे, असं सभागृहाच्या अध्यक्षांनी मुंडेंना सांगितलं. मात्र, मंत्री महोदय असं अनुपस्थित राहत असतील तर ते महाराष्ट्राच्या जनतेला काय न्याय देणार? असा सवाल करत मुंडे आक्रमक झाले. मात्र, लगेच आशिष शेलार हे सभागृहामध्ये बोलण्यास उभे राहिले.

यावेळी शेलार म्हणाले, ''ज्या वेळी अध्यक्षांनी कार्यक्रम घोषित केला तेव्हा जर मुंडे असते तर त्यांनी अशी आदळ आपट केली नसती. अध्यक्षांनी जेव्हा कार्यक्रम घोषित केला त्यामध्ये आता मुंबईच्या विषयावर चर्चा होणार होती. त्यानंतर पुरवणी मागण्यांवर चर्चा होणार होती. मात्र, आता चर्चा सुरू करा मंत्री येतील, असं शेलारांनी सांगितलं.

त्यानंतर गिरीश महाजन यांनीही मध्यस्थी करत चर्चा सुरू करण्याची मागणी केली. मात्र, तरी देखील धनंजय मुंडे हे न ऐकता आणखी आक्रमक झाले. त्यानंतर पुन्हा शेलारांनी स्पष्टीकरण दिलं. दरम्यान, शेलार आणि मुंडे यांच्या जोरदार खडाजंगीमुळे सभागृहात काही वेळ गोंधळ झाला होता.