चव्हाणांनी, शिंदेंवर सोडलेल्या बाणाचा भेद करण्यासाठी भाजप नेते मैदानात

Ashok Chavan : मुंबई : काँग्रेस (Congress) नेते अशोक चव्हाण (Ashok Chavan) यांनी भाजप-शिवसेना युती सरकारच्या काळात युती तोडून काँग्रेस आणि राष्ट्रवादी काँग्रेस पक्षासोबत सरकार स्थापन करण्याचा प्रस्ताव शिवसेनेकडून आला होता. एकनाथ शिंदे यांचा त्या शिष्टमंडळात समावेश होता, असा गौप्यस्फोट केला. त्यानंतर राज्याचे राजकारण ढवळून निघाले आहे. चव्हाण शिंदे यांच्या बाबत बोलले असले तरी त्यांच्या बाजूने भाजप नेते मैदानात उतरले.

भाजपचे प्रदेशाध्यक्ष चंद्रशेखर बावनकुळे यांनी चव्हाण यांच्यावर निशाणा साधला. अशोक चव्हाणांनी एकनाथ शिंदेंऐवजी उद्धव ठाकरेंचे नाव घ्यायला हवे होते, असे ते म्हणाले. अशोक चव्हाण आता एकनाथ शिंदेंचे नाव घेऊन संभ्रम निर्माण करण्याचा प्रयत्न करीत आहेत. आता अशोकरावांनी उद्धव ठाकरेंचे नाव घेतले पाहिजे. अन् सांगितले पाहिजे की, उद्धव ठाकरे आमच्याकडे कॉंग्रेसचे सरकार बनवण्यासाठी आले होते. या लोकांना पाठवले होते, असे त्यांनी म्हणायला हवे होते. मात्र, त्यांनी वाक्य उलटे म्हटले, असा टोला बावनकुळे यांनी लगावला.

मुंबई भाजपचे अध्यक्ष आशिष शेलार यांनी तर अशोक चव्हाण यांना थेट इशाराच दिला. अशोक चव्हाणांची क्लिप आम्ही जाहीर केली, तर त्यांची फार अडचण होईल. ते आमचे चांगले मित्र आहेत. त्यांची अडचण करण्याची आमची इच्छा नाही. काही राजकीय संदेश, प्रथा, परंपरा असतात. त्या प्रथा, परंपरांचा आम्ही भंग करू इच्छित नाही. चव्हाणांच्या वैयक्तिक आयुष्यावर टीका करणार नाही. मात्र, त्यांच्या राजकीय बाबींवर आम्ही बोलू शकतो, अशा शब्दांत शेलारांनी चव्हाणांना इशारा दिला.

इतर भाजप नेत्यांनीही चव्हाण यांच्यावर टीका करत शिंदे यांची बाजू घेतली आहे. शिवसेनेमध्ये बंड करुन शिंदे यांनी भाजपसोबत सरकार स्थापन केले. दरम्यान, औरंगाबादचे माजी खासदार चंद्रकांत खैरे यांच्या 'एकनाथ शिंदे हे १५ ते १६ आमदार घेऊन काँग्रेसमध्ये प्रवेश करणार होते, असा आरोप केला.