'शरद पवारांची भूमिका कधी कुणाला कळलीय का?'

मुंबई : राज्यसभा निवडणुकीमुळे (Rajya Sabha Election) राज्यातील वातावरण सध्या तापलं आहे. शिवसेनेनं (Shivsena) दोन जागा लढवण्याची घोषणा करून मैदानात उडी घेतली आहे. यामुळे राजकीय घडामोडींनाही वेग आला आहे. दरम्यान संभाजीराजेंच्या (Sambhajiraje) समर्थनावरून भाजप नेते आणि विधानसभेतील विरोधीपक्षनेते देवेंद्र फडणवीस (Devendra Fadnavis) यांनी राष्ट्रवादीचे (NCP) अध्यक्ष शरद पवार (Sharad Pawar) यांची भूमिका कधी कुणाला कळली आहे का?, असा खोचक टोला लगावला आहे. त्यांनी आज (ता. 20 मे) प्रसारमाध्यमांशी संवाद साधला.

या वेळी फडणवीसांनी राज ठाकरे यांच्या आयोध्या दौऱ्यावरही आपली प्रतिक्रिया दिली. ते म्हणाले, राज ठाकरे यांनी दौरा पुढे ढकलला आहे. रद्द केला नाही. ते लवकरच आयोध्येला जातील.आयोध्येला जाणाऱ्यांचे स्वागत करावे ही आमची भूमिका आहे. तसेच, ओबीसी आरक्षण हे भाजपमुळे गेले,अशी सातत्याने टीका करणारे कॅाग्रेस प्रदेशाध्यक्ष नाना पटोले यांचा स्मृतीभंश झाला आहे. याचे कारण ओबीसी आरक्षण आहे. ओबीसी आरक्षण हे उध्दव ठाकरे यांच्या काळातच गेल्याची आठवणही त्यांनी यावेळी पटोलेंना करून दिली.

यावेळी संभाजीराजेंच्या राज्यसभा उमेदवारीवरुन माध्यम प्रतिनिधींनी विचारलेल्या प्रश्नावर फडणवीसांनी शरद पवारांवर निशाणा साधला. ते म्हणाले की, पवारांची भूमिका कधी कुणाला कळली आहे का?, असा खोचक सवाल करत त्यानी टीका केली. आम्ही संभाजीराजेंना आमच्या कोट्यातून खासदार केले होते. मात्र त्यांना कधीही पक्षाचा प्रचार करायला लावला नाही. संभाजीराजेंना सहावी जागा का देता त्यांना महत्वाची जागा द्यावी, असे म्हणत फडणवीसांनी शिवसेनेवर निशाणा साधला.

यावेळी फडणवीसांनी शिवसेना खासदार संजय राऊतांवर जोरजार टीका केली ते म्हणाले की, ' राऊत हे महत्त्वाची व्यक्ती नसून त्यांना कुणी गांभीर्याने घेत नाही. महाविकास आघाडी सरकार हे फक्त ढोलकी वाजविण्यात व्यस्त आहे. ते ट्रिपल टेस्ट का करु शकले नाही, याचे उत्तर त्यांनी दिले पाहिजे, असाही हल्लाबोल फडणवीसांनी यावेळी केला.