मोठी बातमी : तब्बल ११ तासांनंतर परबांची चौकशी संपली; उद्या पुन्हा हजर राहण्याचे आदेश

(ED Arrest Anil Parab)

मुंबई : शिवसेनेचे नेते परिवहन मंत्री अनिल परब (Anil Parab) यांची ईडीने तब्बल ११ तास चौकशी केली. त्यानंतर १०. ३० च्या सुमार ते ईडी कार्यालयातून बाहेर आले. ईडीने त्यांना उद्या पुन्हा चौकशीसाठी बोलावले आहे. (Anil Parab ED Action Latest News)

दापोली तालुक्यातील मुरूड येथील बहुचर्चित साई रिसॉर्टवरुन अनिल परब ईडीच्या रडारवर आले आहेत. या रिसॉर्टप्रकरणी ईडीने त्यांच्या घरावर छापे टाकून तपास केला होता. शिवाय मुरुड येथे या रिसॉर्टसंबंधी जवळपास ७ दिवस चौकशी केली होती. या तपासादरम्यान ईडीने मुरूड ग्रामपंचायत, दापोली उपविभागीय अधिकारी कार्यालय, तहसीलदार कार्यालय अशा ठिकाणी जाऊन पुरावेरुपी कागदपत्रे जमा केली आहेत. (Shivsena | Anil Parab Latets News)

भारत सरकारच्या पर्यावरण मंत्रालयाने महाराष्ट्र सरकारला माजी खासदार किरीट सोमय्या आरोप करत असलेल्या साई रिसॉर्ट आणि सी कोच रिसॉर्टवर केलेल्या कारवाईचा अहवाल सादर करण्यास सांगितले आहे. हे पत्र ३१ मे २०२२ रोजी राज्य सरकारला पाठवले आहे. त्यामुळे आता या सगळ्या प्रकरणी अडचणी वाढण्याची शक्यता अधिक आहे. राज्याने केलेल्या कारवाईचा सविस्तर अहवाल पर्यावरण मंत्रालयाला सादर करण्याची मागणी या पत्राद्वारे केली आहे. (Shivsena | Anil Parab Latets News)

यासंबंधी तक्रार भाजप नेते किरीट सोमय्या यांनी जानेवारी २०२२ ला केलेल्या तक्रारीनंतर, कोस्टल झोन नियम मोडल्याचे सांगत राज्य सरकारला कारवाई करण्याचे निर्देश देण्यात आले होते. त्यानंतर राज्य सरकारने केलेल्या कारवाईचा अहवाल मागवण्यात आला आहे. राज्य सरकारने काय कारवाई केली आहे, अशी विचारणा केंद्रीय पर्यावरण मंत्रालयाने केली आहे. केंद्रीय पर्यावरण मंत्रालयाने दिलेल्या पत्रावर राज्य सरकार नेमके कोणते उत्तर देणार, याकडे अनेकांचे लक्ष लागले आहे.

नेमके काय आहे प्रकरण?

भाजप नेते किरीट सोमय्या यांनी मंत्री अनिल परब यांच्यावर या रिसॉर्टप्रकरणी गंभीर आरोप केले आहेत. २०१७ मध्ये एक कोटी रुपये खर्च करून मंत्री अनिल परब यांनी विभास साठे यांच्याकडून दापोली तालुक्यातील मुरुड समुद्रकिनाऱ्याला लागून असलेली साई रिसॉर्टची जमिन खरेदी केली. पुढे २०१७ ते २०२० या काळात साई रिसॉर्टवर २५ कोटी रुपये खर्च केले असा आरोप करण्यात आला आहे.

पण ३० डिसेंबर २०२० रोजी रिसॉर्ट आणि सदर जागा अनिल परब यांनी त्यांचे निकटवर्तीय सदानंद कदम यांना १.१० कोटी रुपयांत विकली आणि करार शेतजमिन म्हणून केल्याचा सोमय्यांचा आरोप आहे. याशिवाय हे रिसॉर्ट बांधताना सीआरझेड कायद्याचा भंग करण्यात आल्याची तक्रारही किरीट सोमय्या यांनी केंद्रीय वन, पर्यावरण मंत्रालयाकडे केली होती.