Amit Shaha In Mumbai : अमित शहा मुंबईत दाखल; महापालिका निवडणुकीसाठी भाजपचा मेगा प्लॅन!

Mumbai News : केंद्रीय गृहमंत्री अमित शहा (Amit Shah) यांचा मुंबई दौरा आज आणि उद्या नियोजित आहे. सह्याद्री अथितीगृहावर अमित शाह यांचा राज्यातील भाजप नेत्यासोबत बैठक पार पडणार आहे. तसेच, महाराष्ट्र भूषण वितरण सोहळ्याला देखील अमित शाह उपस्थित राहणार आहेत, असे असले तरी आगामी मुंबई महानगरपालिकेची निवडणूकीच्या दृष्टीकोनातून शाह यांच्या दौऱ्यावर पाहिले जाते.

अमित शाह यांच्या दौऱ्यामागची पाच प्रमुख अजेंडे -

1 ) मुंबई पालिकेसाठी रणनीती :

महाराष्ट्रातील सत्तासंघर्षाचा निकाल मे महिन्याच्या पहिल्या आठवड्यापर्यंत येण्याची शक्यता वर्तवण्यात येत आहे. यानंतर महाराष्ट्रातील स्थानिक स्वराज्य संस्थांच्या निवडणुका जाहीर होण्याचीही शक्यता आहे. यामुळे आगामी निवडणुकांसाठी

तयारी हा या दौऱ्याचा मुख्य हेतू आहे.

2) ठाकरे गटाची चाचपणी :

शिवसेनेतल्या फुटीनंतर शिवसेना हे पक्षाचं नाव आणि पक्षाचं धनुष्यबाण हे चिन्ह मुख्यमंत्री एकनाथ शिंदे यांना निवडणूक आयोगाने बहाल केले. यावरही सर्वोच्च न्यायालयात संघर्ष सुरू आहे. मात्र सद्यस्थितीत खरी शिवसेना एकनाथ शिंदे यांची आहे. आयोगाच्या निर्णयानंतर आता ठाकरे गटाची शक्ती आणि शिंदे गटाला शिवसेना म्हणून जनमान्यता आहे का ? याचा धांडोळा ही भाजप कडून घेण्यात येणार आहे.

३) मनसेला सोबत घेण्याची शक्यता :

मनसे अध्यक्ष राज ठाकरे यांनी आगामी निवडणुकांसाठी एकला चलो रे ची भूमिका जाहीर केली असली तरी, मुंबई पालिकेत शक्ती निर्माण करण्यासाठी मनसेला सोबत घेता येईल का? अशी ही एक शक्यता व्यक्त करण्यात येत आहे. राज ठाकरे यांचा मागील काही दिवसांपासूव एकनाथ शिंदे आणि भाजपचे नेते यांच्याशी भेटीगाठी वाढल्या होत्या. त्यामुळे निवडणुका जवळ असताना मनसे भाजप आणि शिंदे गट अशी युती होण्याची शक्यता असल्याचे बोलले जात आहे.

४) जागांवाटपासाठी फॉर्म्युला :

आगामी मुंबईच्या निवडणुकांसाठी भाजप आणि शिंदे गटात जागावाटपाचा फॉर्म्युला कसा असणार, याबाबत ही महत्त्वाची चर्चा भाजपच्या बैठकीत होण्याची शक्यता आहे. मुंबईसाठी शिवसेना नेहमी युतीच्या काळात भाजपपेक्षा अधिक जागा लढवत होत्या. मात्र आता राजकीय परिस्थिती बदललेली असताना, भाजप आणि शिवसेना जागांचा फॉर्म्युला बदलण्याची शक्यता आहे.

5) बूथ शक्तीकरणासाठी प्रयत्न :

आगामी निवडणुकांसाठी भाजपचं तळापर्यंत जाळं पसरवण्यासाठी मुंबईतील बूथ सक्षमीकरणावर भाजपकडून विशेष भर देण्यात येणार आहे. आगामी मुंबई महापालिकेची निवडणूक जिंकायचीच या दृष्टीकोनातून अमित शहा नेते आणि पदाधिकाऱ्यांना मार्गदर्शन करणार आहेत.