पोलिस उपायुक्तांना अजितदादा म्हणाले, 'थोडं बारीक व्हा..'

पुणे : राष्ट्रवादी काँग्रेसचे नेते, राज्याचे उपमुख्यमंत्री अजित पवार (Ajit Pawar) हे आपल्या सडेतोड अन् स्पष्ट स्वभावामुळे ओळखले जातात. त्यांचा प्रत्यय गुरुवारी पिंपरी-चिंचवड (Pimpri-Chinchwad) येथील एका कार्यक्रमात आला. एका पोलिस उपायुक्तांना अजितदादांनी प्रेमळ सल्ला दिल्याने उपस्थितांमध्ये हशा पिकला.

पिंपरी-चिंचवड महानगरपालिका मुख्य इमारतीत फायर फायटर बाईक (Firefighter Bikes)आणि पोलिसांना गस्त घालण्यासाठी अत्याधुनिक बाईक वितरण करण्यात आले. अजित पवार यांच्या हस्ते या वेळी या बाईकची चावी पोलिस अधिकाऱ्यांना देण्यात आली. यावेळी त्यांनी हा सल्ला दिला. पिंपरी चिंचवडचे पोलिस आयुक्त अंकुश शिंदे हे देखील यावेळी उपस्थित होते.

पोलिस उपायुक्त डॅा. काकासाहेब डोळे (dr kakasaheb dole) हे अजित पवार यांच्याकडून बाईकची चावी घेण्यासाठी आले. डोळे यांच्या तब्येतीकडे पाहून अजितदादांनी त्यांना "बारीक व्हा..थोडं बारीक व्हा.." असा सल्ला दिला. डोळे हे काही प्रमाणात लठ्ठ आहेत.

माजी गृहमंत्री दिवंगत आर. आर. पाटील यांच्या कार्यकाळाचीही आठवण अजित पवार यांनी काढली. पोलिसांच्या तंदुरुस्तीविषयी आर आर पाटलांच्या काळात पोलिसांसाठी फिटनेस भत्ताही सुरु केला होता, अशी आठवण अजितदादांनी यावेळी सांगितली.