Ajit Pawar News : पोलीस कोठडीत मृत्यू, कायदा सुव्यवस्थेच्या प्रश्न गंभीर : अजित पवारांनी सरकारला सुनावले !

Ajit Pawar News : अर्थसंकल्पीय अधिवेशनाच्या पार्श्वभूमीवर (Budget Session) विधानसभेतील विरोधी पक्षनेते अजित पवार यांच्या विधीमंडळ दालनात आज बैठक आयोजित करण्यात आली होती. उद्यापासून सुरू होणाऱ्या राज्याच्या अर्थसंकल्पीय अधिवेशनात सरकरला घेरण्याची रणनीतीबाबत या बैठकीत चर्चा झाल्याचे समजते. दरम्यान, अजित पवार यांनी पत्रकार परिषद घऊन शेतकऱ्यांचे प्रश्न, राज्याची कायदा सुव्यवस्था, निवडणूक आयोग, शिवसेना पक्ष चिन्हाचा निर्णय इत्यादी मुद्द्यावर त्यांनी सरकारला धारेवर धरले.

राज्यातील कायदा सुव्यवस्था बिघडल्याचे यावेळी पवार यांनी सांगितले, पवार म्हणाले, "राज्यात कायदा सुव्यवस्थेची परिस्थिती गंभीर बनलेली आहे. प्रज्ञा ताई सातव यांच्यावर हल्ला झाला, जितेंद्र आव्हाड यांच्या कुटुंबाना धमकी देण्यात आली. आदित्य ठाकरे यांच्या रॅलीवर हल्ला करण्याचा प्रयत्न झाला, माजी मुख्यमंत्री अशोक चव्हाण यांच्यावर पाळत ठेवली जात आहे, संजय राऊत यांना मारण्याची सुपारी देण्याचा आरोप झाला. ठाणे जिल्ह्यात काल पोलिस ठाण्यात राष्ट्रवादीच्या कार्यकर्त्यांना मारहाण झाली, त्यात एकाचा मृत्यू झाली, हे प्रकरण गंभीर नाही का ? असा सवाल अजित पवारांनी उपस्थित केला.

विरोधी पक्षांच्या नेत्यांना विविध यंत्रणांकडून येणाऱ्या नोटीस आणि होणाऱ्या कारवाईवरही अजित पवार यांनी भाष्य केले. "उद्धव ठाकरे यांच्या आमदार राजन साळवी, वैभव नाईक, नितीन देशमुख यांच्या सारख्या नेत्यांना एसीबीच्या नोटीसी आलेल्या आहेत. हसन मुश्रीफ यांच्यावर छापे टाकण्यात आले. विरोधी पक्षांच्या नेत्यांवर छापे टाकण्याचे एकमेव काम केलं जात आहे."

"आमच्याशी एका शेतकऱ्याने संपर्क साधला, सोलापूरातील शेतकरी राजेंद्र चव्हाण यांनी ५१२ किलो कांदा विकल्यानंतर या शेतकऱ्याला २ रूपयांचा चेक मिळाला आहे. हे दुर्दैव आहे. कांदा उत्पादक शेतकऱ्यांची ही शोकांतिका आहे. राज्यकर्ते कोणीही असो,अशी वेळ शेतकऱ्यांवर येऊ नये.कांदा निर्यात करण्यासाठी ताबडतोब पावले उचलायला हवी. यामुळे शेतकऱ्यांच्या कांदाला भाव मिळेल. आज मागणी आणि पुरवठा याचा ताळमेळ बसत नाही," असेही ते अजित पवार म्हणाले.