कर्नाटक काँग्रेसला सोडचिठ्ठी देत काही तासातच माजी कॅबिनेटमंत्री भाजपमध्ये

नवी दिल्ली : कर्नाटकातील (Karnataka) काँग्रेसचे ज्येष्ठ नेते आणि माजी कॅबिनेट मंत्री प्रमोद माधवराज (Pramod Madhwaraj) यांनी पक्षाचा राजीनामा दिल्यानंतर काही तासातच भाजपमध्ये प्रवेश केला. (Pramod Madhwaraj latest news)

शनिवारी त्यांनी आपला राजीनामा कर्नाटक काँग्रेसचे अध्यक्ष डीके शिवकुमार (DK Shivakumar) यांच्याकडं पाठवला होता. त्यानंतर त्यांनी भाजपमध्ये प्रवेश केला.

माधवराज यांना काँग्रेसनं नुकतंच कर्नाटक काँग्रेसचं (Karnataka Congress) उपाध्यक्षपद दिलं होतं. पण हे पद आपल्याला मान्य नसल्याचे सांगत त्यांनी आपला राजीनामा पक्षश्रेष्ठींकडे सोपवला.

गेल्या तीन वर्षापासून उड्डपी जिल्हा काँग्रेस समितीत मला खूप वाईट अनुभव आला. याबाबत मी केलेल्या तक्रारींची दखल पक्षश्रेष्ठींनी घेतली नसल्याचे माधवराज यांनी सांगितले.

भाजपमध्ये सहभागी होण्यापूर्वी माधवराज यांनी पंतप्रधान नरेंद्र मोदी यांचे कौतुक केलं आहे. प्रमोद माधवराज हे कोळी समाजातील आहेत. ते 2013 मध्ये कर्नाटकच्या उडुपी मतदारसंघातून आमदार झाले आहेत.

कोण आहेत प्रमोद माधवराज

• प्रमोद माधवराज यांना 2016 मध्ये काँग्रेसच्या सिद्धरामय्या सरकारमध्ये (Siddaramaiah Government) कॅबिनेट मंत्री करण्यात आलं होतं.

• त्यांना युवक, क्रीडा आणि मत्स्यव्यवसाय खातं देण्यात आलं होतं. या सरकारमध्ये ते कर्नाटकचे दहावे सर्वोच्च मंत्री होते.

• 2019 च्या लोकसभा निवडणुकीपूर्वी ते जनता दलमध्ये सामील झाले होते. परंतु, काँग्रेस अध्यक्ष राहुल गांधींनी त्यांच्या जागेसाठी प्रचार केला.

• जेडीएसची काँग्रेसशी युती असताना त्यांनी उडुपी-चिकमंगळूर लोकसभा मतदारसंघातून भाजपच्या शोभा करंदलाजे यांच्या विरोधात निवडणूक लढवली, त्याठिकाणी ते पराभूत झाले.