आदित्य ठाकरे मैदानात; शिवसैनिकांना भेटण्यासाठी "निष्ठा यात्रा"

मुंबई : शिवसेनेत (Shivsena) झालेल्या अभुतपूर्व बंडानंतर आता आदित्य ठाकरे (Aditya Thackeray) मैदानात उतरले आहेत. बंडखोर आमदारांच्या मतदारसंघात आदित्य दौरा करणार आहेत. याचवेळी मुंबईतल्या शाखा शाखांमध्ये शिवसेना नेते, युवासेना अध्यक्ष, पदाधिकारी आणि कार्यकर्त्यांच्या भेटीगाठी घेत घेणार आहेत. यासाठी "निष्ठा यात्रा" काढण्यात येणार असल्याचे जाहीर करण्यात आले आहे. शुक्रवार (ता. ७) पासुनच या यात्रेला सुरुवात होणार आहे. (Aditya Thackeray Latest News)

"निष्ठा यात्रेत" आदित्य मुंबईतल्या २३६ शाखांमध्ये जाऊन गटप्रमुख, शाखाप्रमुख, पदाधिकारी आणि कार्यकर्त्यांच्या भेटीगाठी घेणार आहेत. सध्याच्या राजकीय घडामोडींच्या पार्श्वभूमीवर कडवट शिवसैनिकांनी शिवसेनेबद्दल दाखवलेली आत्मीयते बद्दल संवाद साधण्यासाठी "निष्ठा यात्रा" सुरु होणार आहे.

याचवेळी शिवसेनेच्या राज्यातील ५० बंडखोर आमदारांच्या मतदारसंघातही आदित्य ठाकरे "निष्ठा यात्रे" दरम्यान दौरा करणार आहेत. या दौऱ्यात पदाधिकाऱ्यांच्या भेटी, मेळावे ते घेणार आहेत. या मतदार संघांमधील शिवसेनेशी एकनिष्ठ पदाधिकारी आणि कार्यकर्त्यांना बळ देऊन शक्ती प्रदर्शन केले जाणार आहे.

शिंदे गटातील बंडखोर आमदारांनी आपल्या मतदार संघात शक्ती प्रदर्शन करत खरी शिवसेना आपलीच असल्याचे सांगत आहेत. त्यामुळे कार्यकर्त्यांमध्ये गोंधळाचे वातावरण आहे. त्यामुळे आदित्य ठाकरे निष्ठा यात्रेच्या माध्यमातून कार्यकर्त्यांना भेटणार आहेत. या माध्यमातून आता शिंदे गटाला शह देण्यासाठी शिवसेनाही मैदानात उतरली आहे.