मद्य विक्री करणाऱ्या दुकानांना महापुरुषांची, गड किल्ल्यांची नावे दिल्यास होणार कारवाई

मुंबई : मुंबई महापलिकेतील (BMC) विद्यापीठ, महाविद्यालय, शाळा, दुकाने यांचे नामफलक आता मराठीत करण्याचा निर्णय पालिका प्रशासनाने घेतला आहे. ज्या दुकानांमधून मद्य (Wine shops) पुरविले जाते अथवा विक्री केली जाते, अशा दुकानांच्या नामफलकावर महापुरुषांची अथवा गड-किल्ल्यांची नावे लिहू नयेत, असे आदेश मुंबई पालिका प्रशासनाने दिले आहे. मराठी भाषेचा वापर अधिक प्रमाणात व्हावा यासाठी हा निर्णय घेण्यात आल्याचे सांगण्यात आले आहे.

मुंबई पालिकेच्या हद्दीतील दुकाने आणि आस्थापना यांच्या नामफलकावर प्रथमदर्शनी म्हणजे सुरुवातीला मराठी भाषेत देवनागरी लिपीत नाव लिहिणे आवश्यक आहे. तसेच इतर कोणत्या भाषेत देखील नाव लिहिले जाणार असेल, तर त्या भाषेच्या तुलनेत मराठीतील नाव हे मोठ्या अक्षरातच असले पाहिजे. एवढेच नव्हे तर ज्या आस्थापनांमध्ये मद्य पुरविले जाते किंवा विक्री केली जाते, अशा आस्थापनांच्या नामफलकावर महान व्यक्तिंची किंवा गड-किल्ल्यांची नावे लिहू नयेत. या नियमांचे उल्‍लंघन केल्यास संबंधित दुकाने व आस्थापना मालकांवर महाराष्ट्र दुकाने व आस्थापना (नोकरीचे व सेवाशर्तीचे विनियमन) अधिनियम २०१७ च्या तरतुदीनुसार न्यायालयीन कारवाई करण्यात येईल, असे आदेश पालिका प्रशासनाच्या वतीने देण्यात आला आहे.

महाराष्ट्र शासनाद्वारे ‘महाराष्ट्र अधिनियम क्रमांक २४, १७ मार्च २०२२’अन्वये 'महाराष्ट्र दुकाने व आस्थापना (सुधारणा) अधिनियम, २०२२' प्रसिद्ध करण्यात आला आहे. या अधिनियमाचे कलम ३६ क (१) च्या कलम ६ अन्वये नोंदणी केलेल्या प्रत्येक आस्थापनेचा किंवा ज्या आस्थापनेला कलम ७ लागू आहे, त्या प्रत्येक आस्थापनेचा नामफलक देवनागरी लिपीतील मराठी भाषेमध्ये असला पाहिजे. परंतु, अशा आस्थापनेच्या नियोक्त्याकडे देवनागरी लिपीतील मराठी भाषेव्यतिरिक्त इतर कोणत्याही भाषेतील व लिपीतील नामफलक देखील असू शकतील. मात्र, मराठी भाषेतील अक्षरलेखन हे नामफलकावर सुरुवातीलाच लिहिणे आवश्यक आहे. तसेच मराठी भाषेतील अक्षरांचा टंक आकार (Font Size), इतर कोणत्याही भाषेतील अक्षरांच्या टंक आकारापेक्षा लहान असता कामा नये, म्हणजेच मराठी टंक आकार हा इतर कोणत्याही भाषेपेक्षा मोठ्या आकारात असणे आवश्यक आहे.