डोंबिवली : मुंबई, ठाण्यातील नगरसेवकांनी एकमताने मुख्यमंत्री एकनाथ शिंदे (Eknath Shinde) यांना पाठिंबा दिल्यानंतर आता कल्याण डोंबिवलीतील (Kalyan Dombivali) नगरसेवकांनीही गुरुवारी (ता. ७ जुलै) रात्री एकनाथ शिंदे यांची भेट घेत त्यांना समर्थन दिले. यामध्ये सुमारे ५५ नगरसेवक आणि शिवसेनेचे (Shivsena) वरिष्ठ पदाधिकारी उपस्थित होते. त्यामुळे कल्याण डोंबिवलीत शिवसेनेला मोठे खिंडार पडले आहे. (55 corporators from Kalyan Dombivali support Chief Minister Eknath Shinde)
मुंबई, ठाणे महापालिकेच्या बहुतांश नगरसेवकांनी मुख्यमंत्री एकनाथ शिंदे यांना समर्थन दिले आहे. कल्याण डोंबिवलीतील सुमारे ५५ नगरसेवकांनीदेखील शिंदे यांना समर्थन दिले आहे. गुरुवारी रात्री नगरसेवक, शिवसेनेतील पदाधिकाऱ्यांनी मुख्यमंत्री एकनाथ शिंदे यांची भेट घेत त्यांच्या भूमिकेला पाठिंबा दिल्याची माहिती खासदार डॉ. श्रीकांत शिंदे यांनी दिली.
शिवसेना नगरसेवक आणि पदाधिकाऱ्यांच्या या निर्णयामुळे कल्याण डोंबिवलीमध्येदेखील पक्षाला मोठे खिंडार पडले आहे. काही नगरसेवक हे बाहेरगावी आहेत, तर काही प्रकृती अस्वास्थ्यामुळे या वेळी उपस्थित राहू शकले नाहीत. कल्याण डोंबिवलीतील सर्व नगरसेवकांनीही आम्ही सर्वजण मुख्यमंत्री एकनाथ शिंदे यांच्या सोबत असल्याचेच सांगितले आहे, असे खासदार शिंदे यांनी स्पष्ट केले आहे. मुंबईतील नंदनवन या शासकीय निवासस्थानी या सर्व नगरसेवक पदाधिकाऱ्यांनी मुख्यमंत्री एकनाथ शिंदे यांची ही भेट घेतली.
कल्याण डोंबिवली महानगरपालिकेत सेना भाजपा युतीची सत्ता राहिली आहे. कल्याण हा शिवसेनेचा, तर डोंबिवली हा भाजपचा बालेकिल्ला आहे. मागील महापालिका निवडणुकीत शिवसेना भाजपने स्वतंत्र निवडणूक लढवली होती. त्यावेळी सेनेचे ५२, तर भाजपचे ४२ नगरसेवक निवडून आले होते. शिवसेनेने भाजपला कडवी झुंज दिली होती. आगामी निवडणुका लक्षात घेता शिवसेनेने आपली ताकद वाढविण्यास सुरवात केली होती. यातूनच भाजपच्या ७ नगरसेवकांनी काही महिन्यांपूर्वीच शिवसेनेत प्रवेश केला होता, शिवसेनेच्या तीन नगरसेवकांचे निधन झाले आहे.
महापालिकेच्या आगामी निवडणुकीच्या पार्श्वभूमीवर शिवसेनेत निर्माण झालेली दुफळी भाजपच्या पथ्यावर पडणारी ठरणार आहे. मुख्यमंत्री एकनाथ शिंदे व भाजप यांचे सरकार राज्यात आले आहे. शिवसेना पक्षप्रमुख उद्धव ठाकरे की एकनाथ शिंदे असा संभ्रम असलेल्या शिवसेनेच्या सैनिकांनी शिंदे यांच्यासोबत जाण्याचा निर्णय घेतला असल्याचे दिसते.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
