मुंबई : राज्यात कर्करोग प्रतिबंधासाठी टाटा रुग्णालयाने "रोड मॅप' तयार करावा. औरंगाबादमधील कर्करोग रुग्णालयावरील अतिरिक्त ताण कमी करण्यासाठी जालना येथे टाटा रुग्णालयाचे क्षेत्रीय केंद्र (स्पोक) तयार करावे, असे आरोग्यमंत्री राजेश टोपे यांनी आज येथे सांगितले.
कर्करोग निदान केंद्र स्थापन करण्याबाबत सह्याद्री अतिथीगृह येथे आरोग्यमंत्री टोपे यांच्या अध्यक्षतेखाली बैठक झाली. त्या वेळी ते बोलत होते. मुख, गर्भाशय, स्तनाचा कर्करोग याविषयी तपासणी, निदान, उपचाराची व्यवस्था या क्षेत्रीय केंद्रामध्ये करता येऊ शकते, असे टाटा रुग्णालयाच्या तज्ज्ञांनी सांगितले.
औरंगाबाद येथे टाटा रुग्णालयाचे मोठे उपचार केंद्र (हब) आहे. तेथे उपचारासाठी रुग्णांची गर्दी असते. त्यासाठी प्रतीक्षा कालावधी मोठा असल्याने या हबवरील ताण कमी करण्यासाठी नजीकच्या जालना येथे टाटा रुग्णालयाचे क्षेत्रीय केंद्र (स्पोक) सुरू करण्याचा प्रस्ताव टाटा रुग्णालयामार्फत दिला आहे. त्याविषयी आजच्या बैठकीत चर्चा झाली. जालना येथे क्षेत्रीय केंद्र सुरू करण्यासाठी टाटा रुग्णालयातर्फे प्रशिक्षित मनुष्यबळ उपलब्ध करून देताना कर्मचाऱ्यांना प्रशिक्षणही देण्यात येईल.
कर्करुग्णांच्या संख्येत वाढ होत आहे. या रोगाच्या प्रतिबंधासाठी आवश्यक पावले उचलली पाहिजेत. टाटा रुग्णालयाच्या संकल्पनेनुसार श्रेणी-2 अथवा तीन दर्जाचे क्षेत्रीय केंद्र जालना येथे तयार करावे. या क्षेत्रीय केंद्रामध्ये तपासणी, निदान, रेडिएशन, केमोथेरपीची सुविधा उपलब्ध असेल, असे टोपे यांनी सांगितले.
लठ्ठपणा आणि जीवनशैलीशी संबंधित आजारामुळे कर्करोगाचा धोका असल्याचे तज्ज्ञांनी निदर्शनास आणून दिले. त्याविषयी समाजात जाणीवजागृती करण्यासाठी मोहीम हाती घेण्याबाबत आरोग्यमंत्र्यांनी सांगितले. कर्करोगाबाबत प्रत्येक जिल्ह्यात काय उपाययोजना केल्या पाहिजेत याविषयी मार्गदर्शन करण्याचे आवाहनही टोपे यांनी केले. या वेळी बार्शीतील कर्करोग रुग्णालयाबाबत चर्चा झाली.
Edited By - Murlidhar Karale
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.