सातारा : सातारा तहसील आणि प्रांताधिकारी कार्यालयासाठी नवीन इमारत उभारणे आवश्‍यक असून, त्याबाबतचा दिलेला प्रस्ताव तत्काळ मंजूर करून त्यासाठी निधी देण्याची मागणी आज खासदार उदयनराजे भोसले यांनी महसूलमंत्री बाळासाहेब थोरात यांच्याकडे केली.
मुंबई येथे आज उदयनराजेंनी मंत्री थोरात यांची भेट घेतली. भेटीदरम्यान उदयनराजे म्हणाले, "सातारा तहसील आणि प्रांताधिकारी कार्यालय ब्रिटिशकालीन इमारतीत सुरू आहे. याच परिसरात वन विभागाचे कार्यालयही होते, मात्र ते आता इतरत्र नेण्यात आले आहे. दिवसेंदिवस या ठिकाणच्या कामकाजावर ताण येत असून उपलब्ध इमारत, जागा कमी पडत आहे.
या दोन कार्यालयांबरोबरच मुद्रांक शुल्क नोंदणी कार्यालय, निवडणूक शाखा, सेतू, नगरभूमापन व इतर कार्यालयेही याच परिसरात आहेत. या कार्यालयात दररोज हजारो नागरिक येतात. नागरिक, कर्मचारी व अपुऱ्या कार्यालयांमुळे या ठिकाणाला कोंडवाड्याचे रूप आले आहे. त्यासाठी या ठिकाणी बहुमजली इमारत उभारणे आवश्‍यक असून, त्यासाठीचा प्रस्ताव दिलेला आहे.
हा प्रस्ताव मंजूर करत निधी तरतुदीची मागणी केली.'' ही मागणी रास्त असून, यापूर्वी ही मागणी कोणी का केली नाही, याबाबत थोरात यांनी आश्‍चर्य व्यक्‍त करत नवीन इमारतीच्या कामास मान्यता देण्याची कार्यवाही करण्याचे आश्‍वासन दिले. याचदरम्यान उदयनराजेंनी पालिकेच्या एसटीपी प्लॅंटसाठी शासकीय जागेची मागणी केली. त्यानुसार त्यास थोरात यांनी मान्यता दिली.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.