विधानसभेत मनसेला चांगली संधी : अॅड. प्रकाश आंबेडकर

सोलापूर : स्वतःचे अस्तित्व टिकवण्यासाठी सर्वच राजकीय पक्षांनी स्वतंत्रपणे निवडणूक लढवावी, असे  वंचित बहुजन आघाडीचे संस्थापक अॅड. प्रकाश आंबेडकर यांनी येथे सांगितले. येणाऱ्या विधानसभा निवडणुकीत मनसेला चांगली संधी आहे, असेही ते म्हणाले. 

आघाडीच्या पदाधिकारी बैठकीसाठी ते गुरुवारी सोलापुरात आले होते. बैठकीपूर्वी त्यांनी पत्रकार परिषदेत आपली भूमिका मांडली.  ते म्हणाले, ''१५३ मतदारसंघांमध्ये मनसे निवडणूक लढवू शकतो. तसा त्यांना स्पेससुद्धा आहे. मनसे हा सेनेला चांगला पर्याय आहे.  राज ठाकरे यांनी याबाबत पुढाकार घेतला पाहिजे. भाजपा - शिवसेना युतीमध्ये या जागा भाजपाकडे जाणार आहेत .  राज ठाकरे हे हुशार राजकारणी आहेत. सत्तेच्या नादात  काँग्रेस आणि राष्ट्रवादी काँग्रेस या संघटनांचे   विसंघटन झालं आहे . पुन्हा संघटन उभे  करायचे  असेल तर दोघांनी वेगवेगळे लढले  पाहिजे."

ते पुढे म्हणाले, "दोन्ही काँग्रेस आणि राष्ट्रवादी पक्ष व त्यांची लीडरशिप ही डेडएंड ला आली आहे. संघटनही संपलं आहे. ईव्हीएम बाबतचा संशय मी पहिल्यापासून व्यक्त करीत होतो मात्र लोकांनी त्यावेळी हसण्यावर नेले. पण आता हा आरोप खरा ठरत आहे. उद्या (शुक्रवारी) मुंबईत होणाऱ्या पत्रकार परिषदेत मी यावर तांत्रिक माहितीसह काही महत्त्वपूर्ण माहिती देणार आहे. मुस्लिम समाज हा देव मानत नाही तरीदेखील सोलापुरात मुस्लिम मोहल्ल्यामध्ये भारतीय जनता पक्षाच्या उमेदवाराला मतदान झालं हेच संशयास्पद आहे." मुस्लिमांनी अपेक्षेप्रमाणे बहुजन वंचित आघाडीला पाठिंबा दिला नाही , पण जर पाठिंबा दिला तर बहुजन आणि मुस्लिम या दोघांची मिळून  मतांची आघाडी तीस टक्के पर्यंत जाईल असेही आंबेडकर म्हणाले. सोलापूर मतदारसंघात अगदी शेवटच्या क्षणी  मुस्लिम समाज वंचित पासून दुरावला शिवाय मौलवींनी फतवे काढले हे त्याचं कारण आहे, असेही आंबेडकर म्हणाले .