अखेर करमाळ्याचे सेना पदाधिकारी बोलले! म्हणाले, नारायणआबाच!

करमाळा  (जि. सोलापूर) : शिवसेना आमदार नारायण पाटील यांनी पाच वर्षात तालुक्याचा विकास तर केलाच आहे, याशिवाय पंचायत समितीवर शिवसेना भगवाही फडकवला आहे. त्यामुळे पक्षप्रमुख उद्धवजी ठाकरे हे शिवसेनेचे करमाळ्याचे शिवसेनेचे तिकीट आमदार नारायण पाटील यांनाच देतील, असा विश्वास शिवसेनेच्या पदाधिकाऱ्यांनी व्यक्त केला.

आमदार नारायण पाटील यांच्या वाढदिवसानिमित्त जेऊर येथे कार्यक्रम झाला. यावेळी तालुका प्रमुख सुधाकर लावंड, शिवसेनेचे जिल्हा उपप्रमुख महेश चिवटे, शहरप्रमुख प्रविण कटारिया या तिन्ही पदाधिकाऱ्यांनी आमदार नारायण पाटील यांच्या पाठीशी ठामपणे उभे रहणार असल्याचे सांगितले. 
यावेळी स्वामी आनंदयोगी महाराज, गोविंदबापु पाटील, आमदार नारायण पाटील यांच्यासह मोठ्या संख्येने कार्यकर्ते उपस्थित होते. 

दोन दिवसांपूर्वी राष्ट्रवादी काँग्रेसच्या रश्मी बागल यांनी 'मातोश्री'वर जाऊन शिवसेनेत प्रवेश केला. रश्मी बागल यांना शिवसेनेच्या तिकीटाचा शब्द दिल्यानेच त्यांनी शिवसेनेत प्रवेश केल्याचे सांगितले जात असताना करमाळा तालुक्यातील शिवसेनेच्या पदाधिका-यांनी आमदार नारायण पाटील यांच्या बाजुने ठामपणे भुमीका घेतल्याचे दिसून आले. 

बागल यांच्या शिवसेना प्रवेशानंतर कुठलीही प्रतिक्रिया न देण्याऱ्या सेना पदाधिकाऱ्यांनी आमदार नारायण पाटील यांच्या वाढदिवसानिमित्त आयोजित कार्यक्रमात पाटील यांची बाजु घेतल्याने आता पुढे काय होणार, यांची मोठी उत्सुकता आहे.