`माझे विधान भाजप, संघ, बजरंग दलातील लोकांच्या विरोधात होते'

मुंबई ः एमआयएमचे नेते वारिस पठाण यांनी शनिवारी आपले शब्द मागे घेत असल्याचे जाहीर करीत वादग्रस्त विधानाबद्दल माफी मागितली. 

माझ्या विधानामुळे कुणाच्या भावना दुखावल्या असतील तर आपण आपले शब्द मागे घेतो. माझे विधान शंभर कोटी लोकांबद्दल नव्हते तर भाजप, संघ, बजरंग दलातील लोकांच्या विरोधात होते, असा खुलासाही त्यांनी केला. 
कर्नाटकातील गुलबर्ग्यात २१ फेब्रुवारी रोजी आयोजित नागरिकत्व कायद्याविरोधात आयोजित सभेत बोलताना पठाण यांनी आम्ही पंधरा कोटी शंभर कोटींना भारी पडू, असे विधान केले होते. या विधानावरून मोठा राजकीय गदारोळ उडाला होता. 

या पार्श्वभूमीवर पठाण यांनी आज खासदार इम्तियाज जलील यांच्यासोबत पत्रकार परिषद घेत माफीनामा सादर केला. 

माझ्या विधानाचा विपर्यास करण्यात आला. माझे विधान भाजप, संघ, बजरंग दलातील लोकांच्या विरोधात होते, ते हिंदूंच्या विरोधात नव्हते, असे पठाण म्हणाले.