Ashish Deshmukh News: कॉंग्रेसच्या ‘त्या’ नेत्यांना समर्थन जाहीर करण्याचा अधिकार नाही…

Nagpur Teachers Constituency Election : नागपूर शिक्षक मतदारसंघ निवडणुकीत कॉग्रेसचे समर्थन कुणाला, यावरून सगळा घोळात घोळ सुरू आहे. काल माजी मंत्री आमदार विजय वडेट्टीवार आणि आमदार सुनील केदार यांनी विमाशिचे उमेदवार सुधाकर अडबाले यांना समर्थन जाहीर केले. पण त्या नेत्यांना तो अधिकार नाही, ते त्यांचे वैयक्तिक मत असावे, असे माजी आमदार डॉ. आशिष देशमुख (Ashish Deshmukh) यांनी आज सांगितले.

या निवडणुकीत कॉंग्रेसने (Congress) समर्थन कुणाला द्यायचे, यासाठी प्रदेशाध्यक्ष नाना पटोले (Nana Patole) घोळात घोळ घालत आहेत. कॉंग्रेसचे नेते माजी मंत्री आमदार विजय वडेट्टीवार (Vijay Wadettiwar) आणि आमदार सुनील केदार (Sunil Kedar) यांनी काल वडेट्टीवार यांच्या घरी बैठक घेऊन विदर्भ माध्यमिक शिक्षक संघाचे उमेदवार सुधाकर अडबाले यांना समर्थन जाहीर केले. याबाबत विचारले असता डॉ. देशमुख म्हणाले, तो त्यांचा वैयक्तिक विचार आहे. वैयक्तिकरीत्या त्यांनी अडबालेंना समर्थन दिले असेलही. पण ती कॉंग्रेसची भूमिका नाही.

नागपूर पदवीधर मतदारसंघाच्या निवडणुकीत शिक्षक भारतीचे राजेंद्र झाडे यांनी काँग्रेसला मदत केली होती. परिणामस्वरूप ॲड. अभिजित वंजारी यांनी मोठा विजय त्याठिकाणी मिळविला होता. त्यावेळी राजेंद्र झाडे यांना कॉंग्रेसच्या नेत्यांनी शिक्षक मतदारसंघात मदत करण्याचे वचन दिले होते. ते वचन आपण पाळत आहो आणि त्या वचनाची पूर्ती म्हणून राजेंद्र झाडे यांना आज समर्थन जाहीर केले आहे. शिक्षक भारतीचे राजेंद्र झाडे हे विजयी होऊ शकणारे उमेदवार आहेत, असे डॉ. आशिष देशमुख म्हणाले.

मी राष्ट्रवादी कॉंग्रेसचे नेते आणि विरोधी पक्षनेते अजित पवार, शिवसेनेचे पक्षाध्यक्ष उद्धव ठाकरे यांच्याशीसुद्धा याविषयी बोलणार आहे. या दोन्ही नेत्यांनी नागपूर शिक्षक मतदारसंघात राजेंद्र झाडे यांना समर्थन द्यावं, अशी मागणी करणार आहे. त्यानंतर कॉंग्रेसचे प्रदेशाध्यक्ष नाना पटोले यांनीही आता राजेंद्र झाडे यांना समर्थन द्यावे. महाविकास आघाडीचे समर्थन मिळाल्यास राजेंद्र झाडे हे हमखास निवडून येतील, असा विश्‍वास डॉ. आशिष देशमुख यांनी व्यक्त केला. नाना पटोलेंना प्रदेशाध्यक्ष पद सांभाळता येत नाहीये. त्यामुळे त्यांना हटवण्यात यावे, या मागणीचा पुनरूच्चारही त्यांनी केला.