महाविकास आघाडी पुढील पाचशे वर्षे येणाऱ्या सरकारला दिशादर्शक ठरेल...

अमरावती : " भारतीय जनता पार्टी (BJP) म्हणून आम्ही कधीही कोणतेही सरकार पाडण्याचा प्रयत्न करत नाहीत. पण एक खर आहे की यांच्या चुकीच्या कारणामुळे यांच्या आमदारांची जर आज नार्को टेस्ट केली तर सर्वजण म्हणतील की, महाविकास आघाडी (Mahavikas Aghadi) नको," अश्या शब्दात भाजप नेते माजी मंत्री सुधीर मुनगंटीवार (Sudhir Mungantiwar) यांनी शिवसेना (Shivsena) आणि महाविकास आघाडीला सरकारवर जोरदार टीका केली आहे. त्यांनी आज (ता.19 जून) अमरावतीमध्ये माध्यमांशी संवाद साधला. (Sudhir Mungantiwar Latest Marathi News)

मुनगंटीवार म्हणाले, ज्या पद्धतीने सरकार वागतयं यामुळे तर मला वाटतयं की, हे सरकार पुढचे पाचशे वर्षे येणाऱ्या प्रत्येक सरकारसाठी माणसाने कसे वागू नये यासाठी मार्गदर्शक ठरेल, असा खोचक टोला त्यांनी शिवसेना व महाविकास आघाडी सरकारला लगावला.

जनतेच्या आशीर्वादाने 2024 ला राज्यात आमचे सरकार नक्की सत्तेत येईल, असा विश्वास मुनगंटीवार यांनी व्यक्त करत मुख्यमंत्री उद्धव ठाकरे यांच्यावर निशाणा साधला. ते म्हणाले, सध्या राज्याचे मुख्यमंत्र्याच्या माध्यमातून टीका एवढेच कार्य सुरू असून आहे. राज्याचे प्रश्न, समस्यांवर काही निदान किंवा उपाययोजना न करता येता-जाता फक्त केंद्र सराकरवर टीका करणे म्हणजेच मुख्यमंत्र्याचे संविधानिक कर्तव्य आहे. यांच्या संविधानामध्ये एकच वाक्य आहे की, मुख्यमंत्र्यांनी पंतप्रधान आणि केंद्रावर टीका केली की महाराष्ट्र सुजलाम् सुफलाम् होतो. यापेक्षा पुढे काहीही नाही, असा खोचक टोला त्यांनी मुख्यमंत्र्यांना लगावला.

दरम्यान, आज शिवसेनेचा वर्धापन दिवस आहे. ईश्वर त्यांना चांगली सद्बुद्धी देऊन जनतेची सेवा आणि त्याच्या हातून चांगले कार्य घडो एवढीच ईश्वर चरणी प्रार्थना आहे, असे मुनगंटीवार म्हणाले.