Gondia District News : वैनगंगा नदीवर असलेला धापेवाडा पूल भंडारा आणि गोंदिया या दोन्ही जिल्ह्यांना जोडतो. मात्र तिरोडा शहराला येणारा सहा किलोमीटर रस्ता संपूर्ण खड्ड्यात गेलेला आहे. या रस्त्यावर तत्काळ पूल बांधणे गरजेचे असतानाही त्याकडे दुर्लक्ष केले गेले. पण आता तिरोडा विधानसभा मतदारसंघाचे आमदार विजय रहांगडाले यांनी या रस्त्यावरील पुलाच्या बांधकामाचे भूमिपूजन केले.
यासंदर्भात ‘सरकारनामा’ने गेल्या शनिवारी, १८ फेब्रुवारीला ‘शेतकऱ्यांसाठीचा महत्वाचा रस्ता गेला खड्ड्यात, आमदारांच्या मतदारसंघात विकास खुंटला?’ हे वृत्त दिले होते. त्याचा तात्काळ प्रभाव होऊन हालचाली गतीमान झाल्या आणि एकाच दिवसात म्हणजे काल तिरोड्याचे आमदार विजय रहांगडाले यांनी पुलाच्या तिरोडा-कवलेवाडा रस्त्यावर ७० लक्ष रुपये किमतीच्या पुलाच्या बांधकामाचे भूमिपूजन केले. या पुलाचे बांधकाम झाल्यानंतर नागरिकांसह विद्यार्थ्यांना मोठा दिलासा मिळणार आहे.
तिरोडा तालुक्यामध्ये प्रवेश करण्याकरिता हा मुख्य मार्ग आहे. पण या रस्त्याची दुरवस्था मोठ्या प्रमाणात झाली असल्याने या ठिकाणी मोठे अपघात होण्याची शक्यता नाकारता येत नाही. कारण ग्रामीण भागातील विद्यार्थी शिक्षणाकरिता तिरोडा शहरात जातात. पण रस्त्यामुळे येणाऱ्या जाणाऱ्या विद्यार्थ्यांना सुद्धा कमालीचा त्रास सहन करावा लागतो. आता लवकरच या रस्त्यासह इतर कामेही हाती घ्यावे, अशी मागणी विद्यार्थ्यांनी केली आहे.
गोंदिया जिल्ह्यातील तिरोडा विधानसभा मतदारसंघ हा शेतीवर अवलंबून आहे. या ठिकाणी शेतकऱ्यांची उपजीविका म्हणजे शेती. शेतकऱ्यांसाठी बाजारपेठ म्हणून तिरोडा शहरात कृषी उत्पन्न बाजार समितीसुद्धा आहे. याच बाजार समितीमध्ये येण्यासाठी ग्रामीण भागातील शेतकऱ्यांना व नागरिकांना पक्के रस्ते हवेत. पण नेमक्या या महत्वाच्या रस्त्याची अवस्था अतिशय खराब आहे.
गोंदिया (Gondia) जिल्ह्यातील महत्वाचा विधानसभा मतदारसंघ म्हणजे तिरोडा-गोरेगाव. याच मतदारसंघात २०१४पासून भाजपचे (BJP) आमदार विजय रहांगडाले यांची एक हाती सत्ता आहे. तर तिरोडा शहर दुसऱ्या गोष्टीसाठी ओळखले ,जाते ते म्हणजे अदानी पावर प्रोजेक्ट. अदानींचा हा प्रकल्प येथून हाकेच्या अंतरावर आहे. आमदार विजय रहांगडाले यांनी मतदारसंघातील रस्त्यांकडे अक्षरशः दुर्लक्ष केले असल्याचे चित्र पाहायला मिळते.
मागील दोन वर्षांपासून बोदलकसा जलाशयाची पाईप लाइन रेंगाळत आहे. तिरोडा विधानसभा क्षेत्र हा शेतकऱ्यांनी (Farmers) व्यापलेला असला तरी येथील मुख्य धंदा दुग्ध व्यवसायाचा आहे. शेतकऱ्यांची शेती बरोबर दूध व्यवसाय शेतकरी मोठ्या प्रमाणात करतात. मात्र दुधावर अवलंबून असलेला कारखाना आमदार अद्यापही खेचून आणू शकले नाही. आमदार रहांगडाले यांनी आता एका कामावर थांबू नये, तर इतरही रखडलेली कामे पूर्ण करावी, अशी मागणी आहे.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi news on Mobile, Download the Sarkarnama Mobile App for Android and IOS.
सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक,ट्विटर, इन्स्टाग्राम, शेअर चॅट आणि टेलिग्रामवर आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
