Congress News: अधिवेशनापूर्वी कॉंग्रेसने ‘अशी’ दूर केली नागपुरातील पदाधिकाऱ्यांची नाराजी !

Nagpur News : कॉंग्रेसला जर कुणी पराभूत करू शकत असेल, तर ते म्हणजे स्वतः कॉंग्रेस, असे नेहमी सांगितले जाते. कॉंग्रेसचे नेते मिळून राहिले तर काय होते, हे पदवीधर आणि शिक्षक मतदारसंघांच्या निवडणुकीच्या निकालांनी दाखवून दिले आहे. आता रायपूर येथे होत असलेल्या अधिवेशनाच्या तोंडावर काही पदाधिकारी नाराज होते. पण पक्षाने पूर्वसंध्येलाच त्या पदाधिकाऱ्यांची नाराजी दूर केली.

अखिल भारतीय काँग्रेसच्या तीन दिवसाच्या अधिवेशनाला आज सुरुवात झाली. आज सकाळी रायपूरसाठी नागपुरातून अनेक नेते रवाना झाले आहेत. तत्पूर्वी को-ऑफ सदस्यांची अतिरिक्त यादी जाहीर करून राज्यातील नाराजी दूर करण्याचा प्रयत्न पक्षातर्फे करण्यात आला. या प्रयत्नाला यशही आले आहे आणि ‘ते’ नेतेसुद्धा रायपूरसाठी नागपुरातून रवाना झाले आहेत.

अधिवेशनाचे समन्वयक माजी मुख्यमंत्री अशोक चव्हाण आहेत. आर्थिक समितीत माजी मंत्री नितीन राऊत, आमदार प्रणिती शिंदे यांचा समावेश आहे. कृषी विषयक समिती प्रदेश अध्यक्ष नाना पटोले तर सामाजिक न्याय समितीचे प्रमुख मुकुल वासनिक आहेत. अधिवेशनासाठी एकूण दहा समित्या असून त्यात विदर्भातील माजी विजय वडेट्टीवार यांचाही समावेश करण्यात आला आहे. अधिवेशनाचे प्रस्ताव तयार करण्याच्या समितीत माजी मुख्यमंत्री अशोक चव्हाण आणि पृथ्वीराज चव्हाण आहेत.

अधिवेशनासाठी प्रदेश कार्यकारिणीच्या पदाधिकाऱ्यांना निमंत्रित करण्यात आले आहे. त्याकरिता नागपूरमधून नितीन राऊत, सुनील केदार, विलास मुत्तेमवार, अनिस अहमद, विकास ठाकरे, राजेंद्र मुळक, उमाकांत अग्निहोत्री, अभिजित वंजारी, अतुल कोटेचा, विशाल मुत्तेमवार, मुख्य प्रवक्ता अतुल लोंढे काल रात्री रवाना झाले. याशिवाय कुणाल राऊत, अजितसिंह, नितीन कुंभलकर, रामकिशन ओझा आदी पदाधिकारीही अधिवेशनात सहभागी होणार आहेत.

चतुर्वेदी, धवड, जिचकार यांचा समावेश..

काँग्रेसच्या (Congress) प्रदेश प्रतिनिधीच्या यादीतून अनेकांना डच्चू देण्यात आला होता. विद्यमान पदाधिकाऱ्यांनी गटबाजी केल्याचा आरोप झाला होता. नाना पटोले (Nana Patole) यांनी नागपूर (Nagpur) येथे झालेल्या पक्षाच्या कार्यकारिणीच्या बैठकीत काहींची नावे सुटली असल्याचे मान्य केले होते. काँग्रेसने अधिवेशनाच्या काल सायंकाळीच को-ऑफ सदस्यांची अतिरिक्त यादी जाहीर करून नाराजी दूर करण्याचा प्रयत्न केला. नव्या यादीत नागपूरमधून माजी मंत्री सतीश चतुर्वेदी, माजी आमदार अशोक धवड, नरेंद्र जिचकार यांचा समावेश करण्यात आला आहे.