आम्ही आदिवासी, शरद पवार हे आमचे सेनापती!

घोटी : स्वातंत्र्य व संविधानावर बोलणाऱ्या बहुजनांना नक्षली ठरवले जात आहे. शरद पवारसाहेब (Sharad Pawar) आदिवासी नाही, तर आदिवासी वंशज म्हणून आम्ही आदिवासी बांधव पवारसाहेबांना आपला सेनापती मानत आहे. आंतराष्ट्रीय परिषदेत यापुढे पवारसाहेब हे आपले नेतृत्व करत आदिवासींना त्यांचे हक्क मिळवून देतील, असे बिरसा मुंडा ब्रिगेडचे राष्ट्रीय अध्यक्ष सतीश पेंदाम (Satish Pandam) यांनी सांगितले.

आपल्याला वनवासी याचसाठी म्हणतात येथे कोणी आदिवासी नाही, छत्रपती शिवाजी महाराज, छत्रपती संभाजी महाराज यांनीदेखील अन्यायाविरोधात ‘हर हर महादेव’चा नारा देत मोगलांना जेरीस आणले. छत्रपती शिवाजी महाराज व संभाजी महाराज यांना मानणारा आदिवासी बांधव आहे. भाजप, आरएसएसचे बंदे आदिवासींचे हक्क दडपण्यासाठी वनवासी म्हणून आदिवासींना जाणूनबुजून नक्षली ठरवले जात आहे. मात्र यावर आदिवासी नेते बोलत नसल्याची खंत व्यक्त करताना सरदार पटेल यांचा पुतळा बसविण्यात आला, त्यासाठी स्थानिक आदिवासींना विस्थापित करण्यात आले, त्यांना न्याय नाही.

ते पुढे म्हणाले, आज राघोजी भांगरे, बिरसा मुंडा यांच्या स्मारकाचे राष्ट्रीय नेते शरद पवार यांच्या हस्ते भूमिपूजन करण्यात आले. या लढाईत आदिवासींना न्याय देण्यासाठी इतरही समाजाने आम्हाला साथ द्यावी. असे म्हणत व्यासपीठावर जो जमीन सरकारी है, ओ जमीन हमारी है!, बच्चे बच्चे को सिखाना है, वनवासी नहीं हम आदिवासी है! असा नारा श्री. पेंदाम यांनी दिला.

शरद पवारांना मानवंदना

श्री. पेंदाम यांच्या आदेशानुसार श्री. पवार यांना आपला सेनापती मानत बिरसा मुंडा ब्रिगेडतर्फे मानवंदना देण्यात आली. विधानसभेचे प्रभारी अध्यक्ष नरहरी झिरवाळ याच्यासह अन्न व नागरी पुरवठामंत्री छगन भुजबळ, गृहनिर्माण मंत्री जितेंद्र आव्हाड तसेच आजी माजी आमदार, परिसरातील सरपंच, उपसरपंच आदिवासी बांधव उपस्थित होते.

....