संसार उभारायला अक्कल लागते, धुडगूस घालायला नाही!

येवला : माणसांचे संसार उभे करायला अक्कल लागते, धुडगूस घालायला अक्कल लागत नाही. लोकांना भडकावून (Provoke People) प्रश्न सुटत नाही बांधवांनो, प्रत्येकाने राज्याच्या (Maharashtra) हितासाठी विचार करावा, तुम्हाला-आम्हाला प्रगती व विकासासाठी जातीय सलोखा ठेवावाच लागेल, असे आवाहन उपमुख्यमंत्री अजित पवार (Ajit Pawar) यांनी केले.

येवला येथे पालकमंत्री छगन भुजबळांच्या पुढाकाराने उभ्या राहणाऱ्या शिवसृष्टीचे भूमिपूजन श्री. पवार यांच्या हस्ते झाले. या वेळी झालेल्या सभेत ते बोलत होते. अध्यक्षस्थानी पालकमंत्री भुजबळ होते.

श्री. पवार म्हणाले, गेली ५५ वर्षे आमचे नेते शरद पवार सर्व जातीधर्माला सोबत घेऊन चालताय, तरी नको ते आरोप करून राज्याचं वातावरण दूषित करण्याचा प्रयत्न सुरू आहे. शरद पवार महापुरुषांचे नावच घेत नाही, तर त्यांच्या विचारावर चालण्याच काम करत आहेत. बोलणाऱ्याचं वय तेवढी, वर्षे पवारसाहेबाचं राजकारणातील आयुष्य आहे, असा टोमणा त्यांनी राज ठाकरे यांचे नाव न घेता लगावला.

राज्याला आग लावू नका

ऐतिहासिक असलेल्या या शहरात शिवाजी महाराजांच्या स्मृतींना उजाळा देण्यासाठी भव्यदिव्य शिवसृष्टी उभी राहणार आहे. राजेसह अष्टप्रधान मंडळाची सचित्र माहिती येथे पाहायला मिळेल असे श्री.भुजबळ यांनी सांगितले. फुले, शाहू, आंबेडकरांच्या विचारांवर राज्याची वाटचाल सुरू असून, शिवाजी महाराज सर्वश्रेष्ठ आहेत. त्यांचे नाव आज टेन्शन देण्यासाठी वापरले जाते, याची खंत वाटतेय. मुस्लिम द्वेष करणारे भिडे गुरुजी सायकलवरून पडले; पण त्यांचेच ऑपरेशन मुस्लिम डॉक्टरानी केले, हे सांगत माणुसकीपुढे धर्म नसल्याचे भुजबळ म्हणाले.

यावेळी आमदार नरेंद्र दराडे, किशोर दराडे, माजी आमदार मारोतराव पवार, ज्येष्ठ नेते अंबादास बनकर, माजी सभापती संभाजी पवार, माजी खासदार समीर भुजबळ, माजी आमदार पंकज भुजबळ, कल्याणराव पाटील, जिल्हाध्यक्ष रवींद्र पगार, हुसेन शेख, जयदत्त होळकर, माजी सभापती संजय बनकर, महेंद्र काले, राधाकिसन सोनवणे, शिवसेनेचे तालुकाप्रमुख रतन बोरणारे आदी उपस्थित होते. प्रारंभी श्री. पवार व श्री. भुजबळ यांच्या हस्ते कोनशिलेचे अनावरण करून भूमिपूजन झाले.

---