Tanuja Bhoir : शिवसेनेच्या बालेकिल्ल्यातून बड्या नेत्याची कन्या भाजपच्या वाटेवर ? ; 'या' फोटोमुळे चर्चांना उधाण

Nashik News : ठाकरे गटाचे नेते, खासदार संजय राऊत (sanjay raut) हे आजपासून (शुक्रवार) दोन दिवस नाशिकच्या दौऱ्यावर आहेत. राऊत नाशिकला येण्यापूर्वीच एका माजी मंत्र्याच्या कन्येचा फोटो व्हायरल झाला आहे. त्या भाजपच्या वाटेवर असल्याची चर्चा या फोटोमुळे सुरु झाली आहे. (Tanuja Bhoir news update)

देवळाली हा शिवसेनेचा बालेकिल्ला आहे. येथे गेली ३० वर्षे एकहाती प्रतिनिधीत्व केलेले माजी मंत्री बबनराव घोलप यांची कन्या तनुजा भोईर (Tanuja Bhoir) यांचा भाजप नेते आमदार प्रविण दरेकर यांचे स्वागत करतांनाचा फोटो व्हायरल झाला आहे. या फोटोमुळे चर्चांना उधाण आले आहे.

नाशिक जिल्ह्यातील शिवसेनेची गळती थांबवण्यासाठी संजय राऊत आज येत असतांनाच शिवसेनेमधील एका वजनदार नेत्यांच्या मुलीचा भाजप नेत्यांचे स्वागत करतांनाचा फोटो व्हायरल झाल्याने घोलप कुटुंबाची कोंडी झाली आहे.

या महिन्याअखेर शिवसेना उद्धव बाळासाहेब ठाकरे पक्षाचे प्रमुख उद्धव ठाकरे हे नाशिक मध्ये येत आहे. त्यांच्या दौऱ्याची तयारी सुरु असतानाच हा शिवसेनेचा हा मोठा झटका बसला असल्याचे बोलले जात आहे.

एका पाठोपाठ पराभव

बबनराव घोलप यांची मोठी मुलगी माजी महापौर नयना वालझाडे-घोलप व तनुजा भोईर-घोलप यांचा मनपा निवडणुकीत पराभव झाल्यानंतर विधानसभा निवडणुकीत घोलप पुत्र योगेश यांनाही पराभवाला सामोरे जावे लागले. एका पाठोपाठ झालेल्या पराभवाने घोलप कुटुंबाने थोडेही खचून न जाता मतदारसंघात युवकांची नवी मजबुत फळी तयार करुन पक्ष बांधणीला सुरुवात केली आहे.

कौटुंबिक नाराजीची चर्चा

गेल्या दोन अडीच वर्षांपासून तनुजा भोईर या जिल्हा परिषद निवडणुकीची तयारी म्हणून संपुर्ण देवळाली मतदार संघात विविध कार्यक्रम व सामाजिक उपक्रमांच्या माध्यमातून दौरे करीत आहेत.

माजी आमदार योगेश घोलप हे कंबर कसून जनतेच्या संपर्कात असतांना मुलगा योगेश व मुलगी तनुजा दोघेही मतदार संघात जनसंपर्क ठेवून आहेत, तनुजा भोईर यांच्या समर्थकांकडून सोशल मिडियावरील थेट विधानसभा निवडणुकीच्या पोस्ट टाकल्या जात असल्याने जनतेत संभ्रम निर्माण होत असल्याच्या कारणावरुन कौटुंबिक नाराजीची चर्चा आहे.