मनपा निवडणुकीसाठी राष्ट्रवादीचा राजकीय तमाशा

मालेगाव : मालेगाव (Malegaon) महापालिकेच्या आगामी निवडणुका (Cprporation elections) डोळ्यासमोर ठेवून शहरात गेल्या सहा महिन्यांपासून राजकीय तमाशा सुरू आहे. माजी आमदार आसिफ शेख (Ex Mla Asif shaikh) हे शिवसेनेची (Shivsena) युती असल्याचे सोयीस्करपणे विसरले आहेत, अशी टिका महाराष्ट्र नवनिर्माण सेनेचे (MNS) शहराध्यक्ष राकेश भामरे (Rakesh Bhamre) यांनी केली आहे.

श्री. शेख यांनी मनसेप्रमुख राज ठाकरे यांच्यावर आरोप करण्यापूर्वी आत्मपरिक्षण करावे. निरर्थक आरोप केल्यास मनसे जशास तसे उत्तर देईल, असा इशारा त्यांनी यावेळी दिला.

श्री. भामरे म्हणाले, कॉंग्रेसमधून राष्ट्रवादी कॉंग्रेसमध्ये गेलेल्यांची राजकीय अस्तित्व वाचविण्यासाठी धडपड सुरु आहे. त्यातूनच शहराची शांतता धोक्यात आणून जातीयवादी राजकारण करण्यात येत आहे. पक्षनेते राज ठाकरे यांचा अजानला विरोध नाही तर अजानच्या नावाखाली सर्वोच्च न्यायालयाच्या आदेशाचे उल्लंघन करुन अधिक आवाजात वाजविण्यात येणाऱ्या भोंग्यांना आहे.

ते पुढे म्हणाले, शहरात सर्रासपणे न्यायालयाच्या आदेशाचा अवमान होत आहे. रमजानची संधी साधून माजी आमदार आसिफ शेख यांनी घाणेरडे राजकारण सुरु केले आहे, त्याचा आम्ही निषेध करतो. मुस्लिम बांधवांच्या भावनांशी खेळून राजकीय पोळी भाजण्याचा जे प्रयत्न करत आहेत. त्यांचा खरा चेहरा उघड करु, असा इशारा श्री. भामरे यांनी दिला आहे.

---