'त्या वेळची इच्छा आदित्य ठाकरे आता पूर्ण करत आहेत; देव त्यांचे भले करो'

जळगाव : धरणगाव येथील सभेत शिवसेनेचे (Shivsena) नेते आदित्य ठाकरे (Aditya Thackeray) यांनी बंडखोर आमदारांवर जोरदार टीका केली. यावर मंत्री गुलाबराव पाटील (Gulabrao Patil) यांनी प्रत्युत्तर दिले आहे. आम्ही गद्दार नाही तर खुद्दार आहोत असे पाटील म्हणाले. आम्ही जो प्रयत्न केला तो शिवसेना वाचवण्यासाठीच केला. मात्र, शिवसेना वाचवण्यासाठी केलेला हा प्रयत्न त्यांना आवडलेला दिसत नाही. त्यामुळेच ते आमच्यावर टीका करत आहेत, असा टोला त्यांनी लगावला.

आदित्य ठाकरे यांची 'शिव'संवाद यात्रेच्या माध्यमातून आज गुलाबराव पाटील यांच्या धरणगाव येथे सभा झाली. त्या सभेमध्ये शिवसैनिकांनी प्रचंड गर्दी केली होती. त्यावर विचारलेल्या प्रश्नावर पाटील बोलत होते. यावेळी बोलताना पाटील म्हणाले, शिंदे गटात जाण्यापूर्वी मी उद्धव ठाकरे यांची भेट घेतली होती. मात्र, त्यावेळी त्यांनी त्याची दखल घेतली असती तर आज ही वेळ आली नसती.

सर्वात आधी मी गेलो नाही. 32 आमदार गेल्यानंतर मी शिंदे गटात सहभागी झालो. मी एकटा नाही तर मी २० आमदार घेऊन उद्धव ठाकरे यांच्याकडे गेलो होतो. त्यांनी त्यावेळी छत्रपती शिवाजी महाराज यांच्या प्रमाणे तह करायला हवा होता. तह केला असता, तर ही वेळ आली नसती. आदित्य ठाकरे हे तरुण होते, त्यांनी मंत्री असताना अशाच पद्धतीने राज्यभर दौरे करायला हवे होते. अशी आमची अपेक्षा होती. मात्र, त्यांनी तसे केले नाही, असेही गुलाबराव पाटील म्हणाले. मात्र, आमची त्यावेळची इच्छा आदित्य ठाकरे आता पूर्ण करत आहेत. त्यामुळे देव त्यांचे भले करो.

जे शिवसेना संपवायला निघाले आहेत, त्यांच्यासोबतच शिंदे गटाने युती केली असा आरोप आदित्य ठाकरे यांनी त्यांच्या सभेत केली होता. यावरही पाटील यांनी भाष्य केले. राष्ट्रवादी काँग्रेसचे नेते एकनाथ खडसे यांनी भाजप आणि शिवसेनेची युती तोडली होती. त्या खडसेंसोबत तुम्ही बसले, असा हल्लाबोल गुलाबराव पाटील यांनी नाव न घेता उध्दव ठाकरे यांच्यावर केला.

आम्ही शिवसेना वाचवण्यासाठी भाजपसोबत युती केली तर आम्ही गद्दार काय.. नाही आम्ही खुद्दारच आहोत, असेही पाटील म्हणाले. हे सरकार कोसळणारच आहे, असे आदित्य म्हणाले होते. त्यावर पाटील यांना प्रश्न विचारला असता ते म्हणाले, हे सरकार शिवसेना व भाजप युतीचे सरकार आहे. याकडे त्यांनी त्याच दृष्टीने बघितले पाहिजे.