Vinayak Mete: मराठा समाजासाठी लढणारे नेतृत्व हरपले!

धुळे : मराठा (Maratha) समाजाच्या आरक्षणासह (Reservation) समाजाच्या विविध प्रश्‍नांसाठी गेल्या तीन दशकांपासून महाराष्ट्रात (Maharashtra) सातत्याने लढणारा झुंजार लढवय्या नेता काळाने हिरावून नेला अशा भावना व्यक्त करत मान्यवरांनी विनायकराव मेटे (Vinayak Mete) यांना श्रद्धांजली अर्पण केली. (Tribute meeting for Vinayak mete in Dhule)

मराठा समाजाच्या आरक्षणासह विविध प्रश्‍नांवर लढणारे शिवसंग्राम संघटनेचे नेते तथा माजी आमदार विनायकराव मेटे यांचे नुकतेच अपघातात निधन झाले. मराठा क्रांती मोर्चा व सकल मराठा समाजातर्फे येथील मराठा सेवा संघाच्या सभागृहात त्यांना श्रद्धांजली अर्पण करण्यासाठी शोकसभा झाली.

जिल्हा बँकेचे चेअरमन राजवर्धन कदमबांडे, महापौर प्रदीप कर्पे, माजी आमदार प्रा. शरद पाटील, मनपा स्थायी समिती सभापती शीतल नवले, शिवसेनेचे जिल्हाप्रमुख अतुल सोनवणे, राष्ट्रवादी काँग्रेसचे जिल्हाध्यक्ष रणजित भोसले, मराठा क्रांती मोर्चाचे मार्गदर्शक प्रकाश पाटील, काँग्रेसचे कार्याध्यक्ष अशोक सुडके यांच्यासह इतर मान्यवर उपस्थित होते.

विनायकराव मेटे व तसेच एका अपघातात निधन झालेल्या धुळे शहरातील मराठा समाजाचे युवक राजू वाघारे यांच्या प्रतिमेस पुष्पहार अर्पण करून अभिवादन केले.

मराठवाड्यासारख्या मागासलेल्या भागातून एका सामान्य कुटुंबात जन्माला आलेल्या मेटे यांनी संघर्षातून आपले नेतृत्व सिद्ध केले. त्यांच्या आकस्मिक जाण्याने मराठा समाजाचे कधीही न भरून निघणारे नुकसान झाले आहे अशा भावना मान्यवरांनी व्यक्त केल्या, त्यांच्या आठवणींना उजाळा दिला.

यावेळी एस. एम. पाटील, सुधाकर बेंद्रे, शिवाजीराव मराठे, जिल्हा परिषद सदस्य ज्ञानेश्वर भामरे, महापौर श्री. कर्पे, श्री. भोसले, साहेबराव देसाई, राजेंद्र जाधव, प्रा. श्री. पाटील, हिलाल माळी, मराठा क्रांती मोर्चाचे कार्याध्यक्ष प्रदीप जाधव आदींनी श्रद्धांजलीपर मनोगत मांडले. दोंडाईचा येथील नगरसेवक विजय मराठे, संदीप पाटोळे, विजय देवकर, नगरसेवक राजेश पवार आदी उपस्थित होते.

----