आमदार कोकाटे समर्थकांनी पराभवाची परतफेड केली

नांदूरशिंगोटे : तालुक्यातील (Sinner) दोडी बुद्रुक विविध कार्यकारी सेवा सहकारी (Cooperative) सोसायटीच्या निवडणुकीत आमदार माणिकराव कोकाटे (Manikrao Kokate) समर्थक राष्ट्रवादी काँग्रेसचे तालुकाध्यक्ष बाळासाहेब वाघ यांच्या परिवर्तन पॅनलने अकरा जागांवर विजय मिळवत 'परिवर्तन' घडविले. पांडुशेठ केदार यांच्या सत्ताधारी शेतकरी विकास पॅनलला अवघ्या २ जागावर समाधान मानावे लागले.

माजी जिल्हा परिषद सदस्य बाळासाहेब वाघ, माजी सरपंच पी. जी. आव्हाड यांच्या नेतृत्वाखालील परिवर्तन पॅनलचे सर्वसाधारण गटातून अमृता कृष्णा आव्हाड, रघुनाथ एकनाथ आव्हाड, अनिल गणपत जाधव, गेणू वाळीबा साळे, वसंत कारभारी शेळके, मनोहर रामचंद्र वाघ, तर शेतकरी विकास पॅनलचे निवृत्ती म्हतारबा आव्हाड व बाळू हरी दराडे यांनी विजय संपादन केला. शेतकरी विकास गटाचे गोपाळ जयराम आव्हाड, दत्तात्रय कारभारी जाधव, लहाणू हरी सांगळे, सुरेश नामदेव शिंदे, नामदेव कचरू शेळके, ज्ञानेश्वर पांडुरंग उगले व परिवर्तनचे भाऊपाटील जयराम आव्हाड, छगन गोविंद उगले यांना पराभव पत्करावा लागला.

अनुसूचित जाती जमाती गटातून अरूण दादा भालेराव, महिला राखीव गटातून शकुंतला बाळासाहेब वाघ व हिराबाई बाळासाहेब आव्हाड यांनी विजय खेचून आणला. शांताबाई विठ्ठल केदार व सखुबाई मधुकर आव्हाड यांना पराभवाचा धक्का बसला. इतर मागासवर्गीय गटातून सूर्यभान नामदेव आव्हाड यांनी एकनाथ शिवराम आव्हाड यांचा पराभव केला. भटक्या विमुक्त जाती जमाती गटातून शिवाजी कारभारी केदार यांनी शरद बारकू कांगणे यांना पराभूत करत दणदणीत विजय मिळवला. निकाल घोषित होताच वाघ समर्थकांनी गुलालाची उधळण करत जल्लोष साजरा केला.

त्या पराभवाची परतफेड

बाळासाहेब वाघ यांच्या नेतृत्वाखाली १७ वर्ष विविध कार्यकारी सेवा सहकारी सोसायटीवर वर्चस्व होते. मात्र गेल्या पंचवार्षिक निवडणुकीत पांडूशेठ केदार यांनी सोसायटीची सत्ता ताब्यात घेतली होती. बाळासाहेब वाघ यांनी त्याची परतफेड करत या निवडणुकीत १३ पैकी तब्बल ११ जागांवर विजय मिळवत सत्तेची सूत्रे पुन्हा आपल्या हाती घेतली.

---