अटकेची टांगती तलवार असलेल्या गिरीश महाजनांना उच्च न्यायालयाचा मोठा दिलासा

मुंबई : पुण्यातील कोथरूड पोलीस ठाण्यात दाखल असलेल्या तीन वर्षापूर्वीच्या एका फौजदारी फिर्यादीमध्ये भाजपचे (BJP) नेते गिरीश महाजन (Girish Mahajan) यांना उच्च न्यायालयाने (High Court) दिलासा दिला आहे. या प्रकरणात १५ फेब्रुवारीरीपर्यंत महाजन यांच्याविरोधात कठोर कारवाई करू नये, असे आदेश उच्च न्यायालयाने पुणे पोलिसांना (Pune Police) दिले आहेत. त्यामुळे पोलिसांना महाजनांना अटक करता येणार नाही. दरम्यान, पुणे पोलिसांनी जळगावातून टेम्पोभर कागदपत्रे जप्त केल्याचे समजते. (Girish Mahajan Pune Police Case News)

पुणे पोलिसांनी जळगाव जिल्ह्यात पथके पाठवून महाजन यांच्याविरुद्ध कारवाईचा फास आवळला होता. तसेच या निमित्ताने महाजन विरुद्ध एकनाथ खडसे असा वाद सुरू झाला होता. महाजन यांनी खडसे यांना ठाण्यातील रुग्णालयात पाठविण्याचा तर खडसे यांनी महाजनांना पुण्यातील बुधवार पेठेत जाण्याचा सल्ला दिला होता. ही राजकीय धुळवळ एकीकडे सुरू असताना महाजन यांनी न्यायालयीन प्रक्रिया सुरू करत अटकेपासून संरक्षणासाठी धावपळ सुरू केली होती.

कोथरूड पोलीस ठाण्यात महाजन आणि त्यांचे स्वीय सचिव रामेश्वर नाईक यांच्याविरोधात धमकावल्याचा गुन्हा दाखल झाला आहे. त्याविरोधात दोघांनी उच्च न्यायालयात याचिका दाखल केली आहे. जानेवारी २०१८ मध्ये घडलेल्या कथित घटनेवर आता डिसेंबरमध्ये फिर्याद करण्यात आली आहे, असा युक्तिवाद महाजन यांच्या वतीने करण्यात आला होता. न्यायालयाने आधी महाजनांना अटकेपासून संरक्षण दिले होते. हे संरक्षण पुढील सुनावणीपर्यंत न्यायालयाने कायम ठेवले आहे. या प्रकरणी पुढील सुनावणी १५ फेब्रुवारीला होणार आहे.

जळगावमधील निभोरा पोलिस ठाण्यात याबाबत प्रथम फिर्याद नोंदवण्यात आली होती. जळगाव जिल्हा मराठा विद्या प्रसारक समाज संस्थेचे विश्वस्त विजय पाटील यांनी ही तक्रार केली आहे. मात्र, कोथरूड परिसरात ही घटना घडल्यामुळे फिर्याद येथे वर्ग करण्यात आली आहे. दरम्यान, तीन वर्षांपूर्वी घडलेल्या कथित घटनेवर आता फिर्याद केली आहे. त्यामुळे ती रद्द करण्यासाठी हे पुरेसे कारण आहे, असा दावा महाजन यांच्या वतीने करण्यात आला होता.