विधवा नव्हे एकल महिला असे म्हणू या!

नाशिक : राष्ट्रवादी काँग्रेसच्या (NCP) वर्धापनदिनानिमित्त शहर महिला (Womens) संघटनेतर्फे विधवा प्रथा बंदीचा ठराव करण्यात आला. तसेच, शहराध्यक्षा अनिता भामरे (Anita Bhamre) यांनी विधवा महिलांना आपल्या हाताने जोडवी घालत त्यांच्या कपाळावर कुंकू लावले. या भावनिक प्रसंगामुळे महिलांचे डोळे पाणावले होते. जोडवी घातल्याने आता नवीन जीवनास सुरवात होत असल्याचे सांगत शहर महिला काँग्रेसच्या उपक्रमाचे महिलांनी कौतुक केले. (NCP womens wing made a treaty on widow abrogate interdict)

हेरवाड (जि. कोल्हापूर) गावाने विधवा प्रथांच्या निर्मूलनाचा ठराव अमलात आणला. या गावाचा आदर्श घेत राज्यातील अनेक गावांमध्ये त्याची अंमलबजावणी सुरू करण्यात आली आहे. (Anita Bhamre News)

विधवा महिलांना मंगळसूत्र न घालणे, हातातील बांगड्या फोडणे, कपाळावर कुंकू न लावणे, धार्मिक-मांगल्याच्या कार्यक्रमात सहभागी न होणे अशा अनिष्ट प्रथा सुरू आहेत. या प्रथांना तिलांजली देऊन विधवांना सन्मानाची वागणूक मिळावी म्हणून झालेल्या बैठकीचे अध्यक्षस्थान सौ. भामरे यांनी स्वीकारावे, अशी सूचना कुंदा सहाणे यांनी मांडली. त्यास योगिता आहेर यांनी अनुमोदन दिले.

या बैठकीत विधवा प्रथा बंदीचा ठराव मंजूर करण्यात आला. कार्यक्रमास अपेक्षा अहिरे, रूपाली पठारे, सरिता पगारे, मिनाक्षी गायकवाड, लता नागरे, संगीता चौधरी, हर्षदा बर्वे, कल्पना शिंदे, जिजाबाई घोडेराव, डॉ. मृगाक्षी क्षीरसागर, सिम्मी राणा, मंगला मोकळ, रूपाली अहिरे, वैशाली ठाकरे, शशिकला जगताप, संध्या बोराडे, अनिता पवार, अनसूया कांबळे, अनिता मोरे, अनु राणा, रेखा चौधरी आदी उपस्थित होत्या.

....