महाराष्ट्रातील ४३ शहरांमध्ये क्लायमेट प्लॅन तयार

नाशिक : नागरीकरणामुळे (Urbanisation) वेगाने वातावरणात बदल होत आहे. या बदलांमुळे हवेतील कार्बनचे (Carbon emission) प्रमाण वाढत असल्याने राज्य शासनाच्या पर्यावरण विभागाने ४३ शहरांमध्ये क्लायमेट प्लॅन तयार केला आहे. त्याच अनुषंगाने नाशिक (Nashik) महापालिका व वर्ल्ड रिसोर्स इन्स्टिट्यूटमध्ये शुक्रवारी पर्यावरणमंत्री आदित्य ठाकरे (Aditya Thakre) यांच्या उपस्थितीमध्ये सामंजस्य करार करण्यात आला.

महाराष्ट्र राज्य पर्यटन महामंडळाच्या गंगापूर धरण येथील रेस्ट हाऊस मध्ये बैठकीचे आयोजन करण्यात आले होते. पर्यावरण मंत्री आदित्य ठाकरे, नगरविकास मंत्री एकनाथ शिंदे, कृषी मंत्री दादा भुसे, खासदार हेमंत गोडसे, जिल्हाधिकारी सूरज मांढरे, महापालिका आयुक्त कैलास जाधव आदी उपस्थित होते. २०५० पर्यंत कार्बनचे प्रमाण शून्यावर आणण्यासाठी ही मोहीम राबविली जात आहे. रेस टू झिरो उपक्रमाअंतर्गत सहभागी होणारे नाशिक हे पहिले नॉन मेट्रो शहर ठरले आहे. एनर्जी वेस्ट मॅनेजमेंट यासारख्या बाबींवर या माध्यमातून काम केले जाणार आहे.

पावसाच्या वेळेत मोठ्या प्रमाणात बदल झाले आहे. एकाच वेळी मोठ्या प्रमाणात पाऊस पडतो, तर हिवाळ्यात थंडीचे प्रमाणही वाढले आहे. हा वातावरणातील बदल कार्बनचे प्रमाण वाढत असल्याने होत आहे. त्यामुळे वातावरण कृती आराखडा अर्थात क्लायमेट प्लॅन करणे गरजेचे आहे. त्या अनुषंगाने कार्बनचे प्रमाण कमी करण्यासाठी महापालिका व मुंबईस्थित एका संस्थेमध्ये सामंजस्य करार करण्यात आला. २०५० पर्यंत टप्प्याटप्प्याने कार्बनचे प्रमाण कमी करणे हा प्रमुख उद्देश आहे. त्यासाठी महापालिकेमध्ये समिती गठित केली जाणार आहे. घनकचरा व्यवस्थापन ग्रीन बिल्डींग उपक्रम राबवणे पाण्याचे स्रोत बळकट करणे हवेची गुणवत्ता सुधारणे आदी उपक्रम राबविले जाणार आहे

शाश्वत विकास करताना सर्व घटकांना बरोबर घेतले जाणार आहे. शहरांचे हिरवेगारपणा टिकविण्यासाठी वातावरण कृती आराखडा तयार केला जात आहे.

- आदित्य ठाकरे, पर्यावरणमंत्री.

---