एकनाथ खडसेंच्या पक्षांतरावर आज जनमताचा कौल

जळगाव : राष्ट्रवादी कॉंग्रेसचे नेते एकनाथराव खडसे (Eknath Khadse) यांनी भारतीय जनता पक्षातून(bjp) राष्टवादी कॉंग्रेसमध्ये (ncp) पक्षांतर गेल्यानंतर त्यांच्या घरच्या मतदार संघातील बोदवड नगरपंचायतीच्या मतदानाचा आज (ता. १९) निकाल लागत आहे. खडसे यांच्या पक्षांतरावर आज प्रथमच जनमताचा कौल मिळणार आहे. तर पालकमंत्री गुलाबराव पाटील व माजी मंत्री गिरीश महाजन (Girish Mahajan) यांच्या नेतृत्वाचीही कसोटी आजच्या निकालात दिसणार आहे.

जळगाव जिल्हयातील मुक्ताईनगर तालुक्यातील बोदवड नगरपंचायतीसाठी झालेल्या मतदानाची आज मतमोजणी होणार आहे. बोदवड हे राष्ट्रवादी कॉंग्रेसचे नेते एकनाथराव खडसे यांच्या मुक्ताईनगर मतदार संघातील नगरपंचायत आहे. या नगरपंचायतीवर खडसे यांच्या नेतृत्वाखाली भारतीय जनता पक्षाची सत्ता होती. ते राष्ट्रवादी कॉंग्रेसमध्ये गेल्यानंतर प्रथमच या नगरपंचायतीची सार्वत्रिक निवडणूक होत आहे.

खडसे यांच्या पक्षानंतर जिल्ह्यातील ही पहिलीच सार्वजनिक निवडणूक आहे. त्यामुळे खडसे यांच्या पक्षांतरावर जनमताचा कौल मिळणार आहे. राष्ट्रवादी कॉंग्रेसने या निवडणूकीत सर्वच्या सर्व १७ जागा लढविल्या आहेत. खडसे यांच्या नेतृत्वाखाली राष्ट्रवादी कॉग्रेसला बोदवड नगरपंचायतीत बहुमत मिळणार याकडे संपूर्ण महाराष्ट्राचे लक्ष असणार आहे. एकनाथ खडसे यांनीही या निवडणूकीसाठी स्वत: मैदानात उतरूण प्रचार केला आहे, तर त्यांच्या कन्या ॲड. रोहिणी खडसे यांनीही यासाठी जोरदार प्रयत्न केले आहेत. खऱ्या अर्थाने एकनाथ खडसे यांच्यासाठी ही निवडणूक महत्वाची असणार आहे.

पाटील, महाजन यांचीही कसोटी

जिल्ह्याचे पालकमंत्री गुलाबराव पाटील व भाजप नेते माजी मंत्री गिरीश महाजन यांच्याही नेतृत्वाची ही कसोटी आहे. राष्ट्रवादी कॉंग्रेसनंतर शिवसेनेने निवडणूकीत संपूर्ण १७ जागा लढविल्या आहेत. मुक्ताईनगरचे अपक्ष आमदार व शिवसेना जिल्हाप्रमुख चंद्रकांत पाटील यांनी पक्षाचे उमेदवार निवडून आणण्यासाठी जिकरीचे प्रयत्न केले आहेत, तर शिवसेना नेते व पालकमंत्री गुलाबराव पाटील यांनीही या ठिकाणी पक्षाच्या उमेदवारांच्या विजयासाठी जाहीर सभा घेतल्या आहेत. त्यामुळे पालकमंत्री म्हणून गुलाबराव पाटील यांच्या नेतृत्वाचीही कसोटी आहे. तर भाजप नेते गिरीश महाजन यांच्याही नेतृत्वाची कसोटी आहे.