मी मूक प्रेक्षक बनून स्वस्थ बसणार नाही : अमित शहांचा महाविकास आघाडीला थेट इशारा

नगर : देशाचे पहिले केंद्रीय सहकारमंत्री अमित शहा (Amit Shah) यांनी सहकार पंढरीत येऊन राज्य सरकारला कानपिचक्या दिल्या. महाविकास आघाडी सरकारला (Mahavikas Aghadi Govt) थेट भाषेत इशारा देऊन या सरकारने पक्षपातीपणा करण्याचे सोडून द्यावे. मी येथे मूक प्रेक्षक बनून राहणार नाही, याची थेट जाणीव त्यांनी करून दिली.

माजी मंत्री राधाकृष्ण विखे पाटील यांनी आयोजित केलेल्या सहकार परिषदेत आणि शेतकरी मेळाव्यात शहा यांनी आज जोरदार भाषण केले. मी सहकारमंत्री झाल्यानंतर अनेकांनी माझ्याविषयी शंका व्यक्त केल्या. मला सल्ले देण्यास सुरवात केली. खरे तर त्यांनी मला सल्ले देण्याऐवजी स्वतःकडे पाहिले असते तर सहकाराची परिस्थिती सुधारली असती. माझ्याकडे हे खाते आले असले तरी मी पक्षपाती पद्धतीने निर्णय घेणार नाही. सहकारी संस्थेचे नेतृत्व हे कोणत्या राजकीय विचारधारेशी जोडलेले आहे, याचा विचार मी करणार नाही. मात्र येथील महाविकास आघाडी सरकार निर्णय घेताना पक्षपाती पद्धतीने निर्णय घेत आहे. हे मी मूक प्रेक्षक म्हणून पाहणार नाही.``

सहकार चळवळीला नवीन दिशा देण्यासाठी मोदी सरकारने सहकार खाते निर्माण केले आहे. सहकारी चळवळीशी अधिकाधिक लोक जो़डले जावेत, याचा विचार मी करणार आहे. सहकारी संस्था स्वतःच्या पायावर उभ्या राहाव्यात, याचा विचार करायला हवा. किती दिवस सरकारी मदतीवर या संस्था चालवायच्या, असा प्रश्न आता उपस्थित होत आहे. `अमूल`सारखी संस्था जगभरात आपला ब्रॅंड निर्माण करत असेल तर इतर संस्थांना ते का जमू नये? माझ्याकडे सहकार खाते आल्यानंतर साखर कारखान्यांना दिलासा देणारे अनेक निर्णय घेतले. मोदी सरकारही त्यासाठी कटिबद्ध आहे, असा विश्वास त्यांनी या व्यक्त केला.