भाजपला मोठे खिंडार; 21 नगरसेवकांचा राष्ट्रवादीमध्ये प्रवेश

जळगाव : राष्ट्रवादी काँग्रेसमध्ये सध्या मोठ्या प्रमाणात इनकमिंग सुरु आहे. भुसावळमध्ये भाजपला मोठा झटका बसला आहे. भाजपच्या 21 नगरसेवकांनी राष्ट्रवादी काँग्रेसमध्ये (NCP) प्रवेश केला. उपमुख्यमंत्री अजित पवार (Ajit Pawar) यांच्या उपस्थितीत नगरसेवकांनी हाती घड्याळ बांधले. त्या मुळे पुन्हा एकदा एकनाथ खडसे (Eknath Khadse) यांनी भाजपला धक्का दिला.

अजित पवार आज (ता.१७) जळगाव जिल्हा दौऱ्यावर होते. यावेळी पवार यांच्या उपस्थिती या नगरसेवकांनी राष्ट्रवादीत प्रवेश केला. यावेळी एकनाथ खडसे, माजी आमदार संतोष चौधरी, माजी विधानसभा सभापती अरूणभाई गुजराथी, माजी आमदार डॉ, सतीश पाटील व्यासपीठावर उपस्थित होते.

या वेळी अजित पवार म्हणाले, जळगाव जिल्हा शुध्द सोन्यासाठी प्रसिध्द आहे. मात्र, याच ठिकाणी असलेल्या एकनाथ खडसे यांच्या सारख्या नेत्याच्या नेतृत्वाची किमंत भाजपला कळली नाही, असा टोला पवार भाजपला लगावला. खडसे अगोदर ज्या पक्षात होते, त्या पक्षाने त्यांना त्रास दिला. त्यांचा अपमान केला. त्यांच्या खोट्या नाट्या चौकशा लावल्या. या अगोदर या महाराष्ट्रात कधीच असे घडले नाही. मात्र, त्या पक्षाने ते घडविले. राज्याचे पहिले मुख्यमंत्री यशवंतराव चव्हाण यांनी संयुक्त महाराष्ट्राचा कलश आणला, त्या वेळी हे राज्य छत्रपती शिवाजी महाराज यांच्या विचाराचे राज्य असावे, सुसंस्कृत राज्य असावे असा त्यांचा विचार होता, आणि आजपर्यंत त्याच विचाराने राज्य सुरू होते.

आता ठराविक लोकांना त्रास देण्याचे काम सुरू आहे. परंतु जो पक्ष हा त्रास देण्याचे काम करीत आहेत, त्यांना आपले सांगणे आहे, कि चार दिवस सासूचे असतात, चार दिवस सूनेचे असतात. त्यामुळे आज सार्वभौम जनता आहे, त्यांना डॉ. बाबासाहेब आंबेडकर यांच्या घटनेने मताचा अधिकार दिला आहे. जर ही जनता खवळली तर ज्या प्रमाणे तुम्हाला डोक्यावर घेते त्या प्रमाणे मतांच्या अधिकारावर तुम्हाला बाजूला करू शकते हे लक्षात असू द्यावे असा, ईशाराही त्यांनी दिला. एकनाथराव खडसे यांच्या नेतृत्वाखाली जळगाव, धुळे, नंदुरबार जिल्हयात राष्ट्रवादी कॉंग्रेस वाढविण्याकडे आपण सर्वानुमते लक्ष देवू या असे मतही त्यांनी व्यक्त केले.