सीताराम कुंटे ED कार्यालायात : तिसऱ्या समन्सनंतर अखेर झाले हजर

मुंबई : मुख्यमंत्र्याचे प्रधान सल्लागार आणि राज्याचे मुख्य सचिव सीताराम कुंटे (Sitaram Kunte) ईडी कार्यालयात हजर झाले आहेत. माजी गृहमंत्री अनिल देशमुख (Anil Deshmukh) यांच्या १०० कोटी वसुलीच्या आरोपांप्रकरणी ईडीला त्यांची चौकशी करायची होती. याबाबत कुंटे यांना ईडीकडून समन्सही बजावण्यात आले होते. अनिल देशमुख गृहमंत्री असताना सीताराम कुंटे गृह विभागात अतिरिक्त मुख्य सचिव पदावर कार्यरत होते. त्यानंतर फेब्रुवारीमध्ये त्यांची राज्याचे मुख्य सचिव म्हणून नियुक्ती करण्यात आली होती.

कुंटे यांना यापुर्वी ईडीकडून तीन समन्स बजावण्यात आले होते. मात्र त्यावेळी प्रशासकीय काम आणि मंत्रिमंडळाच्या बैठका-दौरे यामुळे त्यांनी ईडीकडे वेळ मागून घेतला होता. त्यानंतर कुंटे आता चौकशीसाठी ईडी कार्यालयात हजर झाले आहेत. मुख्यमंत्र्यांच्या प्रधान सल्लागारांचीच चौकशी होणार असल्याने राज्यात उलट-सुलट चर्चा सुरु आहे.

फोन टॅपिंग प्रकरणातही चौकशी

परमबीरसिंग यांनी देशमुखांवर केलेल्या खंडणीच्या आरोपानंतर गुप्तवार्ता विभागाच्या तत्कालीन प्रमुख रश्मी शुक्ला यांच्या फोन टॅपिंगचे प्रकरण बाहेर आले. शुक्ला यांनी पोलीस अधिकाऱ्यांच्या बदल्यांबाबतचा धक्कादायक अहवाल दिला होता. यामध्ये अनेक वरिष्ठ अधिकाऱ्यांच्या बदल्यांचा आणि त्यांच्या पोस्टींगसाठी मध्यस्थांमार्फत लाचेचा मुद्दा समोर आला. त्यामुळे राज्यभर वादळ उठले.

फोन टॅपिंग प्रकरणात कुंटे यांनी राज्य सरकारला अहवालही सादर केला आहे. यामध्ये त्यांनी शुक्ला यांनी केलेल्या दाव्यानुसार संबंधित काळात कोणत्याही अधिकाऱ्यांच्या बदल्या झाल्या नसल्याचे म्हटले आहे. शुक्ला यांनी फोन टॅपिंगची परवानगी घेतली त्यावेळी कुंटे हे गृह विभागाचे अतिरिक्त मुख्य सचिव होते. त्यांनी परवानगी दिल्याचा दावा शुक्ला यांनी केला होता. पण परवानगी घेताना शुल्का त्यावेळी खोटे बोलल्याचा दावा करण्यात आला आहे. या प्रकरणाची ईडीकडूनही चौकशी सुरू आहे. त्यामुळे ईडीने कुंटे यांना चौकशीसाठी बोलावले असल्याचे समजते.