कॉंग्रेससह तयार होत असलेल्या आघाडीला नेतृत्व देण्याचे काम शरद पवारांचे!

मुंबई : आम्ही ममता बॅनर्जींसोबत राहणार की कॉंग्रेससोबत राहणार याची चिंता काहींना वाटत आहे. परंतु जे स्वतःला चाणक्य समजत होते त्यांना मात देणारे शरद पवार खरे चाणक्य आहेत, हे लक्षात घ्यावं असं म्हणतं राष्ट्रवादी काँग्रेसचे मुख्य राष्ट्रीय प्रवक्ते आणि अल्पसंख्याक मंत्री नवाब मलिक यांनी विरोधकांना टोला लगावला आहे.

नवाब मलिक म्हणाले, या देशात विविध प्रश्नांवर ज्यापध्दतीने युपीएच्या बैठका व्हायला हव्या होत्या त्या झाल्या नाहीत हि सत्य परिस्थिती आहे. पण आता आम्हाला या देशात ममता बॅनर्जी, टीआरएस, सपा, आरजेडी, दक्षिणेतील पक्ष या सर्वांची मोट बांधायची आहे. कॉंग्रेससह एक नवीन आघाडी तयार करायची आहे. सामुहिक नेतृत्व निर्माण करुन ही आघाडी काम करेल आणि यात काँग्रेससोबतत राहणार आहे, असेही नवाब मलिक यांनी स्पष्ट केले.

राष्ट्रवादी काँग्रेस ममता बॅनर्जींसोबत राहणार की कॉंग्रेससोबत? याची चिंता काहींना वाटत आहे. परंतु जे स्वतःला चाणक्य समजत होते त्यांना मात देणारे शरद पवार चाणक्य आहेत, हे लक्षात घ्यावे. शिवसेना आणि काँग्रेस हे दोन पक्ष महाराष्ट्रात एकत्र येतील असे कोणालाही वाटले नव्हते. पण तशीच परिस्थिती या देशात आहे. बरेच लोक आहेत जे कधी सोबत येणार यावर चर्चा होत नाही. परंतु या सगळ्यांची मोट बांधण्याचे काम शरद पवार करतील. कोणालाही याच्यातून बाहेर काढून ही आघाडी होणार नाही. सगळ्यांचा समावेश करायचा आहे यादृष्टीने ते काम करत आहेत, असेही नवाब मलिक यांनी सांगितले.

ममता बॅनर्जी या दोन दिवसांच्या दौर्‍यावर असताना त्यांनी शरद पवारांची भेट घेतली. त्यानंतर त्यांनी आमच्या मंत्र्यांशी चर्चा केली. यावेळी त्यांनी देशात मोदी सरकारच्याविरोधात असंतोषाचे वातावरण असून सर्व विरोधी पक्षांनी एकत्र येऊन एक नवीन पर्याय देण्याची गरज असल्याचे मत मांडले. त्यावर शरद पवारांनी आम्ही सर्व विरोधी पक्षांना एकत्र आणण्याचा प्रयत्न करणार असल्याचे स्पष्ट केले असल्याचेही मलिक म्हणाले.