Udayanraje Bhosle : उदयनराजेंनी पालिका प्रशासनास फटकारले; म्हणाले, "अशुद्ध पाणीपुरवठा..."

Udayanraje Bhosle News : स्वच्छ व पुरेशा दाबाने पाणीपुरवठा करण्याची जबाबदारी नगरपालिका प्रशासनाची आहे. शहराच्या पश्चिम भागाला अशुद्ध, अपुरा, कमी दाबाने पाणीपुरवठा होत असेल तर ते अत्यंत क्लेशदायी आहे. संबधित कर्मचाऱ्यांनी कामात सुधारणा करावी, अन्यथा बदली करून घ्यावी. नागरिकांच्या भावनांशी व जीवाशी खेळण्याचा प्रकार सहन करून घेतला जाणार नाही, असा इशारा खासदार उदयनराजे भोसले यांनी दिला आहे.

सातारा शहरात (Satara) होणाऱ्या पाणीपुरवठ्याबाबत खासदार उदयनराजे यांनी प्रसिद्धीपत्रक काढले आहे. त्यात त्यांनी कर्मचाऱ्यांचा चांगलाच समाचार घेतला आहे. उदयनराजेंनी पत्रकात म्हटले आहे की, "शहराच्या पश्चिम भागात गेल्या तीन महिन्यांपासून रामाचा गोट, मंगळवार पेठ भागात दूषित पाणीपुरवठा होत होता. त्याबाबत सातारा विकास आघाडीने प्रशासनाला सूचनाही केल्या होत्या. पण, प्रशासन गेंड्याची कातडी पांघरून बसले होते. अशा अधिकाऱ्यांना व कर्मचाऱ्यांना वठणीवर आणायला वेळ लागणार नाही."

शुद्ध पाण्याऐवजी डेडस्टॉकमधील पाणी सोडण्यात आल्याची माहितीही उदयनराजे (Udayanraje Bhosle) यांनी यावेळी दिली. ते म्हणाले, "स्वच्छ व शुद्ध पाणीपुरवठा हा नागरिकांचा हक्क आहे. कास धरणाची उंची वाढवण्यात आली आहे. धरणापासून नवीन अतिरिक्त पाईपलाईनही मंजूर करण्यात आली आहे. पश्चिम भागातील पाणीपुरवठ्या बाबत माहिती घेतली असता फिल्टर केलेले पाण्याऐवजी डेड स्टॉकमधील पाणी संबंधित कर्मचाऱ्यांनी सोडल्याने निदर्शनास आले. असे असेल तर संबंधित कर्मचाऱ्यांना तातडीने निलंबित करा."

कामात हलगर्जी करणाऱ्या कर्मचाऱ्यांनी बदली करून घेण्याचा इशाराही त्यांनी यावेळी दिला. उदयनराजे म्हणाले की, "पाणीपुरवठ्याच्या वितरण पद्धतीत अधिकारी आणि कर्मचारी यांनी तातडीने सुधारणा करावी. ज्यांना काम जमत नसेल तर त्यांनी तातडीने आपली बदली करून घ्यावी. शहराच्या पश्चिम भागातील अपुरा व शुद्ध पाणीपुरवठा तत्काळ थांबवा. शुद्ध आणि अधिक दाबाने पाणी द्या."

(Edited by Sunil Dhumal)