Budget Session : शशिकांत शिंदेंचा विधीमंडळात आवाज; मुख्यमंत्री शिंदेंनी दिले हे आश्वासन....

Shashikant Shinde News : सातारा जिल्ह्यातील कण्हेर, धोम प्रकल्पग्रस्त खातेदारांना पुनर्वसन विभागाच्या आदेशाप्रमाणे वाटप करण्यात आलेल्या भूखंडांचे आता भोगवटा वर्ग एकनुसार स्वतंत्र सात-बारा होणार आहेत. यासंदर्भात आमदार शशिकांत शिंदे यांनी तारांकित प्रश्नाद्वारे विधिमंडळाच्या अधिवेशनामध्ये आवाज उठवल्यानंतर मुख्यमंत्री एकनाथ शिंदे Eknath Shinde यांनी तसे आश्वासन दिल्याची माहिती स्वतः आमदार शशिकांत शिंदे यांनी दिली.

यासंदर्भातील दिलेल्या पत्रकात आमदार शशिकांत शिंदे यांनी म्हटले की, सातारा जिल्ह्यातील कण्हेर व धोम प्रकल्पग्रस्तांचे पुनर्वसन सातारा तालुक्यामध्ये १७ गावठाणांमध्ये व कोरेगाव तालुक्यामध्ये १६ गावठाणांमध्ये करण्यात आले आहे. परंतु या गावठाणांमध्ये पुनर्वसन करण्यात आलेल्या खातेदारांना पुनर्वसन विभागाच्या आदेशाप्रमाणे वाटप करण्यात आलेल्या भूखंडाची चौरस मीटरप्रमाणे संबंधित खातेदारांच्या नावावर भोगवटा क्रमांक एकमध्ये सात-बारावर नोंद करण्यात आलेली नव्हती.

त्यासाठी या प्रकल्पग्रस्तांकडून सातत्याने मागणी केली जात होती. त्यानुसार प्रकल्पग्रस्तांच्या या प्रश्नावर मी पुढाकार घेऊन जिल्हास्तरावर, तसेच राज्य पातळीवर वारंवार बैठका घेतल्या होत्या. या पार्श्वभूमीवर सध्या सुरू असलेल्या विधिमंडळाच्या अधिवेशनामध्ये तारांकित प्रश्नाच्या माध्यमातून प्रकल्पग्रस्तांच्या पुनर्वसित गावांतील जमिनींचे सात-बारा प्रकल्पग्रस्तांच्या नावावर होण्यासाठी आवाज उठविला.

या तारांकित प्रश्नावर उत्तर देताना मुख्यमंत्री एकनाथ शिंदे यांनी सांगितले, की कोरेगाव तालुक्यातील १६ व सातारा तालुक्यातील १७ गावठाणांमध्ये पुनर्वसन करण्यात आलेल्या खातेदारांना वाटप करण्यात आलेल्या भूखंडांचे भोगवटा वर्ग एकनुसार स्वतंत्र सात-बारा लवकरात लवकर करण्यात येतील. मुख्यमंत्री शिंदे यांनी दिलेल्या आश्वासनामुळे सातारा व कोरेगाव तालुक्यांतील कण्हेर, धोम प्रकल्पग्रस्त खातेदारांचा प्रश्न आता मार्गी लागणार असल्याचे आमदार शशिकांत शिंदे यांनी पत्रकात नमूद केले आहे.