शरद पवारांनी केले युवक काँग्रेसच्या पदाधिकाऱ्यांचे कौतुक...

कऱ्हाड : महाराष्ट्र प्रदेश युवक काँग्रेसच्या पदाधिकाऱ्यांची निवड प्रक्रिया पूर्ण झाल्यानंतर उपाध्यक्ष शिवराज मोरे यांच्या नेतृत्वाखाली प्रदेशच्या पदाधिकाऱ्यांसह जिल्हाध्यक्षांनी काँग्रेसच्या ज्येष्ठ नेत्यांसह राष्ट्रवादीचे अध्यक्ष, खासदार शरद पवार यांचाही भेट घेतली. दिल्ली येथील सहा जनपथ या त्यांच्या निवासस्थानी भेट घेवून त्यांच्याशी संवाद साधला. यावेळी श्री. पवार यांनी पदाधिकाऱ्यांचे अभिनंदन करत त्यांना मार्गदर्शन केले. (Sharad Pawar with Youth congress News)

युवक काँग्रेसच्या पदाधिकाऱ्यांना शरद पवार यांनी अर्धा तासच वेळ देऊन सुद्धा युवक काँग्रेसच्या अनुभवात पवार रमले. युवक काँग्रेसच्या पदाधिकाऱ्यांशी जवळपास अडीच तास चर्चा कशी रंगली याचे भानच कुणाला राहिले नाही. निवडून आलेल्या प्रत्येक पदाधिकाऱ्यासोबत श्री. पवार यांनी संवाद साधला. यावेळी शिवराज मोरे यांच्याशी त्यांनी चर्चा केली.

युवक काँग्रेसच्या निवडणुक प्रक्रीयेची माहिती घेतली. श्री. मोरे यांनीही राजकीय कारकीर्द, विद्यार्थी काँग्रेसमधील क्षण, आंदोलनासहीत उपाध्यक्षपदापर्यंतचा प्रवास सांगितला. यावेळी श्री. पवार यांनी त्यांचे कौतुक केले. ते म्हणाले, उत्तम संघटन कौशल्य आहे. अशीच कारकीर्द सुरू ठेवल्यास उद्याचे भविष्य समृद्ध असेल असे म्हणत त्यांनी मोरे यांच्या संघटन कौशल्याचेही विशेष कौतुक केले. पदाधिकाऱ्यांशी संवाद साधताना श्री. पवार यांनी राजकारणाची सुरुवात युवक काँग्रेस मधून झाली. त्यात पुणे युवक काँग्रेसचा अध्यक्ष असल्यापासून ते राज्याचा सरचिटणीस पदापर्यंतची त्यावेळची निवडणूक प्रक्रिया त्यांनी समजून सांगितली.