Karad : ऊसदरासाठी सदाभाऊ खोतांचे यशवंतराव चव्हाणांच्या समाधिस्‍थळाला साकडे...

कोपर्डे हवेली : ज्येष्ठ नेते यशवंतराव चव्हाण यांनी सहकार चळवळ उभी केली; परंतु आज त्यांचे चेले त्यांचा विचार विसरले आहेत. फक्त सत्तेच्या खुर्चीसाठी त्यांचे नाव घेत आहेत. चव्हाण साहेब या कारखानदारांना उसाला ३ हजार ५०० रुपये दर देण्याची सुबुद्धी द्या, असे साकडे शेतकऱ्यांच्या वतीने कऱ्हाडातील यशवंतराव चव्हाण यांच्या समाधिस्थळी आमदार सदाभाऊ खोत यांनी घातले.

कोपर्डे हवेली ते ज्येष्ठ नेते यशवंतराव चव्हाण यांच्या समाधी स्थळापर्यंत काढण्यात आलेल्या पायी दिंडीच्या सांगता प्रसंगी ते बोलत होते. बळिराजा शेतकरी संघटनेचे केंद्रीय अध्यक्ष पंजाबराव पाटील, रयत क्रांती संघटनेचे पश्चिम महाराष्ट्र अध्यक्ष सचिन नलवडे, शेतकरी सुदाम चव्हाण, भरत चव्हाण, राजेंद्र चव्हाण, यांच्यासह शेतकरी उपस्थित होते.

श्री. खोत म्हणाले, ‘‘इतर जिल्ह्यातील कारखान्यांनी गेल्या वर्षीच्या उसाला तीन हजार १०० च्या पुढे दर दिला; परंतु जिल्ह्यातील कारखानदारांनी शेतकऱ्यांची २८००-२९०० रुपयावर बोळवण केली आहे. कारखान्यातील स्पर्धा वाढली, तरच उसाला चांगला भाव मिळेल. यासाठी दोन कारखान्यांतील २५ किलोमीटरचे अंतराची अट शिथिल केली पाहिजे.

सर्व पक्षांतील कारखानदारांची युती आहे. त्यांनी शेतकऱ्यांना लुटण्याचे ठरवले आहे. त्यांचा स्वाहाकार हाच पक्ष आहे. इतर व्यवसायाला कसलीही बंधने नाहीत, कोणीही कुठेही कोणताही व्यवसाय सुरू करू शकतो; परंतु साखर कारखान्यांनाच २५ किलोमीटर अंतराचे बंधन घातले आहे.’’

श्री. पंजाबराव पाटील म्हणाले, ‘‘साखर कारखानदारांचा शेतकरी गुलाम झाला आहे. रस्त्यावरची लढाई लढावी लागेल. साखरेला दर चांगला मिळतो आहे. शिवाय उसापासून इतर उपपदार्थ तयार होतात, त्यामुळे कारखानदारांना चांगला दर द्यायला परवडत आहे.’’

सचिन नलवडे म्हणाले, की ज्या यशवंतराव चव्हाण यांनी सहकार रुजवला त्यामुळे सर्वसामान्य शेतकऱ्यांकडे सुबत्ता आली. यशवंतराव चव्हाणांचे नाव घेऊन साखर कारखानदार राजकारण करत असतात. त्यासाठी आम्ही यशवंतराव चव्हाण यांच्या समाधिस्थळी येऊन कारखानदारांना ३५०० रुपये दर देण्याची सुबुद्धी द्या, अशी मागणी केली आहे.