Pankaja Munde : पंकजा मुंडेंचा दसरा मेळावा पुन्हा वादाच्या भोवऱ्यात

उमेश मोरगावकर

Pankaja Munde : दसरा मेळाव्याच्या मुद्द्यावरून पंकजा मुंडे समर्थक व विरोधक यांच्यात दोन गट पडले असून, मुंडे समर्थक गटाने बीड जिल्ह्यातील सावरगाव येथे पंकजा मुंडे ( Pankaja Munde ) यांच्या उपस्थितीत होणाऱ्या मेळाव्यास सर्वांनी उपस्थित राहण्याचे आवाहन केले असताना, दुसऱ्या गटाने भगवानगडाच्या पायथ्याला मेळावा घेण्याची तयारी सुरू केली आहे. त्यामुळे पोलिसांची डोकेदुखी वाढली आहे.

भगवानगडाचे महंत डॉ. नामदेवशास्त्री यांनी गडावर भाषणबंदी केल्यानंतर मुंडे यांनी 2017 पासून सावरगाव येथे मेळावा घेण्यास सुरवात केली आहे. या वर्षीही हा मेळावा होणार असून, त्यास मोठ्या संख्येने उपस्थित राहण्याचे आवाहन तालुक्यातील मुंडे समर्थकांनी केले असले, तरीही आता भगवानगड कृती समितीने गडाच्या पायथ्याला मेळावा घेण्याची तयारी सुरू केली आहे. हा मेळावा घेऊ द्यावा, अशी परवानगी भारजवाडीतील आजिनाथ बटुळे यांनी पोलिसांकडे मागितली.

या मेळाव्यासाठी शिवराज बटुळे यांनी आपली जागा देण्याची तयारी दर्शविली होती. मात्र, पोलिसांनी मेळाव्याला परवानगी नाकारली आहे. मेळाव्याला गडाच्या पाच किलोमीटर परिसरात परवानगी देऊ नये, असा ठराव परिसरातील खरवंडी कासार, मालेवाडी व घोगस पारगाव या ग्रामपंचायतींनी केला आहे.

याशिवाय मुख्य गडावर मेळावा घेऊ देऊ नये, असे पत्रही नामदेवशास्त्री यांनी पोलिसांना दिले आहे. तरीही गडाच्या पायथ्याला मेळावा घेण्यासाठी औरंगाबाद येथील बाळासाहेब सानप यांनी पुढाकार घेतला आहे. या मेळाव्यास आता पंकजा मुंडे समर्थकांनी विरोध केल्याने, या विषयावर येत्या काही दिवसांत रणकंदन होऊन पोलिसांची डोकेदुखी वाढणार असल्याचे मानले जात आहे.